Զինված ու դիմակավորված ավազակային հարձակում՝ Արմավիրում. ընտանիքի անդամները վնասազերծել են մեկին
Արմավիրի մարզում, այսօր՝ նոյեմբերի 29-ին, ավազակային հարձակում է տեղի ունեցել. ժամը 00։10-ի սահմաններում Ոստիկանության Արմավիրի բաժին ահազանգ է ստացվել, որ 2 անհայտ անձինք՝ դիմակավորված եւ հրազենով զինված, ցանկապատի վրայից փորձել են մուտք գործել Զարթոնք գյուղի 9-րդ փողոցի տներից մեկը։
Shamshyan.com-ի փոխանցմամբ, տանտերերը, նկատելով, դիմադրություն են ցույց տվել, որոնցից մեկը դիմել է փախուստի, իսկ մյուսին տանտերերը բռնել են։
Տեղում ոստիկանները ավազակային հարձակում կատարելու կասկածանքով Մեծամորի ոստիկանություն են բերման ենթարկել Արմավիրի մարզի բնակիչ 39-ամյա Կարեն Ա.-ին։ Պարզվել է, որ վերջինս ինքնությունը չպարզած անձի հետ փորձել են ավազակային հարձակում կատարել, որոնց դիմադրություն են ցույց տվել Զարթոնք գյուղի բնակիչներ 49-ամյա Մարինե Ա.-ն, նրա հայրը՝ 79-ամյա Ռաֆիկ Ա.-ն եւ մայրը՝ 71-ամյա Զոյա Խ.-ն։
Ընտանիքի անդամները վնասազերծել են Կարեն Ա.-ին, իսկ նրա հանցակից ընկերը հրազենով դիմել է փախուստի։
Ոստիկաններն ու քննիչները դեպքի վայրի զննությամբ հայտնաբերել են «ԱԿՍ» տիպի ինքնաձիգի 1 փամփուշտատուփ՝ 18 հատ 5.45 մմ տրամաչափի փամփուշտներով, կտորից սարքված 2 հատ դիմակ, 1 հատ էլեկտրաշոկ, 1 զույգ կտորից ձեռնոց, մահակ, ինչպես նաեւ տոպրակ, որի մեջ եղել է թափանցիկ կպչուն ժապավեն եւ պոլիմերային կապիչներ։