«Լիդիան Արմենիա»-ի աշխատակիցները Կառավարության շենքի դիմաց բողոքի ակցիա են իրականացնում. հստակ պատասխան են ակնկալում (տեսանյութ, ֆոտոշարք)
Այսօր` օգոստոսի 13-ին, Ամուլսարի ճանապարհների ապօրինի շրջափակման դեմ Ամուլսարի շրջակա համայնքների բնակիչները և «Լիդիան Արմենիա» ընկերության աշխատակիցները բողոքի ցույց են իրականացնում ՀՀ կառավարության շենքի դիմաց` պահանջելով վերջ տալ ճանապարհների ապօրինի շրջափակմանը: Ցուցարարները պահանջում են նաև հանդիպում ՀՀ վարչապետ Նիկոլ Փաշինյանի հետ` ակնկալելով խնդրի լուծման հետ կապված Կառավարության հստակ պատասխանը:
Ցուցարարներից Գևորգյան Արմանը հայտնել է, որ ցանկանում են իմանալ` ինչն է պատճառը, որ արդեն 53 օր է` նրանք չենք կարողանում կատարել իրենց աշխատանքային պարտականությունները:
«Ռուսաստանից ենք եկել: Ստեղ փորձել ենք մեր ընտանիքը պահել: Հիմա էլ չգիտենք`երբ կաշխատի: Սպասում ենք, մինչև պատասխանը լինի», - ասաց նա` հավելելով, որ պատրաստ են սպասել այնքան, մինչև պատասխան չստանան:
«Եթե վտանգ է ներկայացնում, իմանանք, որ վտանգ է, թողնենք գնանք», - հավելեց Ա. Գևորգյանը:
Մեկ այլ ցուցարար` կենսաբան Մխիթար Արշակյանը տեղեկացրել է, որ բազմիցս դիմել են Կառավարությանը` փորձելով պարզել ինչն է պատճառը, որ արդեն 53 օր է, որ նրանք չեն կարողանում աշխատանքի դուրս գալ, սակայն որևէ պատասխն չեն ստացել:
«Որոշեցինք գալ այստեղ և դիմել վարչապետին, որպեսզի ստանանք կոնկրետ պատասխանը՜ երբ ենք մենք աշխատելու: Հիմա սպասում ենք թե հանդիպմնանը, թե աշխատանքային օրվա ժամն ու պահը», - ասաց Արշակյանը, նշելով, որ կսպասեն այնքան, որքան պետք է, մինչև պատասխանը չստանան:
Հիշեցնենք, որ այսօր Ամուլսարի հարակից համայնքների բնակիչները հայտարարություն են տարածել, որում ասվում է.
«Մենք՝ Ամուլսարի շրջակա համայնքների՝ Գորայքի, Սարավանի, Գնդեվազի, Ջերմուկի և այլ համայնքների հազարից ավելի բնակիչներ, արդեն երկրորդ անգամ դիմել ենք վարչապետին և կառավարությանը, կոչ անելով միջամտել՝ վերջ տալ Ամուլսարի ճանապարհների ապօրինի շրջափակմանը և ապահովել արժանապատիվ աշխատելումեր սահմանադրական իրավունքի վերականգնումը։ Այսօր մենք՝ հարյուրից ավելի պատվիրակությամբ այս համայնքերից եկել ենք Երևան և մնալու ենք կառավարության շենքի մոտ՝ մեր ձայնը լսելի դարձնելու կառավարությանը։
Միաժամանակ դիմում ենք Հայաստանի բոլոր իրավապաշտպան կազմակերպություններին՝ մեր կոպտորեն խախտվող իրավունքները պաշտպանելու կոչով։ Մի քանի տասնյակ անձինք՝ հանդես գալով համայնքի անունից, արդեն 50 օր ապօրինաբար զրկել են մեզ աշխատելու իրավունքից։ Այս արարքը ապօրինություն է, և պատկան մարմինները պետք է քայլեր ձեռնարկեն մեր իրավունքները պաշտպանելու ուղղությամբ։
Արդյոք Ամուլսարը համապատասխանում է բնապահպանական նորմերին, պետք է որոշեն համապատասխան կառույցները, և ոչ թե մի խումբ՝ անհայտ աղբյուրներից սնվող օրինազանց մարդիկ։ Մինչդեռ պետությունը այսօր քայլեր չի ձեռնարկում հանքի շինարարության ապօրինի կասեցումը դադարեցնելու և մեր՝ օրինապաշտ քաղաքացիներիս իրավունքները պաշտպանելու և ապօրինություն իրականացնող ինքնակոչ «բնապահպաններից» պաշտպանելու համար։
Մենք ենք համայնքը և մենք ենք իրականում Հայաստանի հպարտ քաղաքացիները: Մեր իրավունքները կոպտորեն խախտվում են։ Հպարտ քաղաքացին աշխատասեր, արժանապատիվ հարկատուն է, ոչ թե մի քանի ամիս անհայտ աղբյուրներից սնվող՝ ուղղորդված ապօրինություն իրականացնողները»։
Հիշեցնենք նաև, որ երեկ տեղեկացրել էինք այն մասին, որ «Լիդիան Արմենիա»-իաշխատակիցներն ի նշան իրենց բողոքի փակել են Սարավանի կողմից դեպի Ամուլսարի հանք տանող ճանապարհը: Ըստ նրանց` դեպի Ամուլսար տանող ճանապարհի փակ լինելու պատճառով իրենք տևական ժամանակ չեն կարողանում կատարել իրենց պարտականությունները և վերադառնալ աշխատանքի, թեև, ըստ փորձագիտական եզրակացությունների` հանքի շահագործումը որևէ վնաս չի հասցնում շրջական միջավայրին:
Մանրամասները՝ Zham.am-ի տեսանյութերում:
Zham.am