Wildberries-ի պահեստների վրա հարձակման հետևանքով միլիոնավոր դրամների վնասներ են կրել նաև հայաստանցիները

Մերձմոսկովյան շրջանում Ուկրաինայի կողմից Wildberries-ի պահեստների պայթեցման հետևանքով ֆինանսապես վնասներ են կրել նաև շատ հայաստանցիներ։  Սոցիալական ցանցերում հրապարակած տեսանյութերից պարզ է դառնում, որ այդ վնասները գերազանցում են որոշ դեպքերում նաև մի քանի մլն դրամը։

Քրիստինե Բոյաղչյանն իր էջում պատմում է, որ իր ապրանքը ևս եղել է այդ պահեստներում։

«Այս իրավիճակում ամենավատն այն է, որ հուլիսի 7-ին Wildberries-ը ընդունել է օրենք, որ ֆորսմաժորային նման իրավիճակներում ընկերությունը չի փոխհատուցելու մեր՝ վաճառողներիս գումարները; Այս պահին խայտառակ իրավիճակ է բոլորի մոտ։ Խոսքը 200-300 ապրանքնրի մասին չէ, այլ միլիոնավոր, մեկը ես միլիոնների ապրանք ունեի պահեստներում»,-մանրամասնում է  նա։

Քիչ առաջ ընկերությունը հայտնեց, որ Wildberries-ի «Կոլեդինո» լոգիստիկ կենտրոնն աշխատում է բնականոն ռեժիմով։ Ընկերության բոլոր հիմնական գործընթացներն իրականացվում են անխափան։

Ավելի վաղ Wildberries-ի հիմնադիր Տատյանա Կիմը հայտարարել է, որ ընկերությունը մշակում է այն վաճառողների փոխհատուցումների և ֆինանսական աջակցության մեխանիզմները, որոնց ապրանքները պահվել են Էլեկտրոստալի և Կոտովսկի լոգիստիկական կենտրոններում։

Նրա խոսքով՝ չնայած ստեղծված արտակարգ իրավիճակին և կորցրած ապրանքների համար փոխհատուցում տրամադրելու իրավական պարտավորության բացակայությանը, ընկերությունն արդեն գնահատում է վաճառողներին կատարվելիք վճարումների ծավալները և ֆինանսական աջակցության լրացուցիչ միջոցառումները։

Վաճառողների համար նախատեսվող փոխհատուցումների, աջակցության միջոցների և դրանց ստացման կարգի վերաբերյալ մանրամասն տեղեկատվությունը կհրապարակվի վաճառողների պորտալում։

Բացի այդ, Տատյանա Կիմը հայտնել է, որ Wildberries-ը ֆինանսական աջակցություն կտրամադրի նաև լոգիստիկական կենտրոնների վրա հարձակումների հետևանքով զոհվածների ընտանիքներին և տուժածներին։ Զոհվածների ընտանիքները կստանան 2 միլիոն ռուբլի, իսկ ծանր վիճակում գտնվող տուժածները՝ 1 միլիոն ռուբլի։

Հիշեցնենք, որ հուլիսի 18-ի գիշերն ուկրաինական անօդաչու թռչող սարքերը հարձակվել են Wildberries-ի երկու պահեստի վրա՝ մեկը Մոսկվայի, մյուսը՝ Տամբովի մարզում։ Առնվազն ութ մարդ զոհվել է, ավելի քան 80-ը՝ վիրավորվել։
Աղբյուրը` Panorama.am