ԵՄ հատուկ ներկայացուցչի խայտառակ հայտարարությունը. Քաղաքական վերլուծաբան

Քաղաքական վերլուծաբան Հակոբ Բադալյանը գրում է.

«ԵՄ հատուկ ներկայացուցչի՝ թերեւս առանց չափազանցության խայտառակ հայտարարությունը:

«Այսպիսով, մենք, իհարկե, որպես դրա մաս (խաղաղության աջակության), դիտարկում ենք, թե ինչպես կարող ենք լավագույնս աջակցել նաև մարդասիրական հարցերին, և այդ առումով՝ ականազերծումը գլխավորն է: Այն կարող է ազդեցություն ունենալ անմիջականորեն տուժած համայնքների վրա», այսօր Երեւանում հայտարարել է ԵՄ այսպես ասած հատուկ ներկայացուցիչ Մագդալենա Գրոնոն, որի նախորդը տխրահռչակ Տոյվո Կլաարն էր:

Ի՞նչն է այս հայտարարության մեջ խայտառակը: Այն, որ հայ-ադրբեջանական այսպես կոչված խաղաղության գործընթացի մարդասիրական կարեւոր, գլխավոր բաղադրիչը նա համարում է ականազերծումը, այն դեպքում, երբ կան այսօր Բաքվի բանտերում պատանդառված եւ ապօրինաբար պահվող հայ մարդիկ:

Մարդասիրական գլխավոր հարցը պետք է լինի այդ մարդկանց ազատության ու տուն վերադարձի հասնելը, այլ ոչ թե ականազերծումը, որն առավելապես ադրբեջանական «հոգս» է: Եվ այստեղ ակնառու է դառնում, որ Ադրբեջանը իր այսպես ասած հոգսը ԵՄ համար դարձրել է հայ-ադրբեջանական պրոցեսի «մարդասիրական գլխավոր հարց», այդպիսով «քողարկելով» իրական գլխավոր հարցը՝ Արցախի ռազմա-քաղաքական ղեկավարության ներկայացուցիչներին եւ դեռեւս 44-օրյա պատերազմից պահվող հայ զինվորներին պատանդի կարգավիճակում օգտագործելը»։