ԵՄ վերնախավին չեն հետաքրքրո՞ւմ ԵԱՀԿ ԺՀՄԻԳ գնահատականները Հայաստանի ընտրությունների վերաբերյալ

Այսօր ԵՄ Բարձրագույն ներկայացուցչի անունից հայտարարություն է տարածվել Հայաստանի խորհրդարանական ընտրությունների արդյունքների վերաբերյալ, որտեղ կոչ է անում Հայաստանի քաղաքական ուժերին՝ հարգել քվեարկության արդյունքները:

Այս հայտարարության մեջ ևս մեկ անգամ ընդգծվում է, որ իրենք աջակցում են Փաշինյանին՝ փաստացի պատասխանատվություն վերցնելով նրա բոլոր գործողությունների՝ այս ընտրարշավի ամբողջ ընթացքում կատարված ընտրախախտումների վերաբերյալ, փարիսեցիաբար ընտրախախտումների ողջ մեղքը բարդելով Փաշինյանի ընդդիմախոսների վրա:

Սա ևս մեկ անգամ ապացուցեց, որ ԵՄ-ն ժառանգել է նախկին տոտալիտար ռեժիմների ավանդույթների ողջ համալիրը, և հանուն իրենց  շահերի, նրանք պարտրաստ են զոհաբերել եվրոպական մնայուն արժեքները:

Իսկ որ այդ արժեքները ոտնահարվել էին ԵՄ-ի աջակցությունը վայելող Փաշինյանի ռեժիմի կողմից, փաստվում է նաև ԵԱՀԿ միջազգային դիտորդների հայտարարության մեջ, որտեղ նշված էր, որ Հայաստանում խորհրդարանական ընտրություններն անցկացվել են ընդդիմադիր գործիչների դեմ քրեական շինծու գործեր հարուցելով, որի արդյունքում անհավասար պայմաններ էին ձևավորվել ընտրությունների ընթացքում: Նույն դիտորդների հայտարարության մեջ նշված էր, որ նախընտրական արշավն ընթացել է հակամարտության մթնոլորտում, որի շրջանակներում ընդդիմադիր գործիչների և ակտիվիստների վրա բազմաթիվ ու բազմաբնույթ քրեական գործեր են հարուցվել, ինչի հետևանքով հանրության ընդդիմադիր հատվածի կողմնակիցների ակտիվությունը զգալիորեն նվազել էր:

ԵԱՀԿ ԺՀՄԻԳ միջազգային դիտորդները նշել էին նաև, որ իշխանությունները ճնշում են գործադրել պետական հատվածում աշխատող քաղաքացիների վրա՝ ընտրությունների արդյունքի վրա ազդելու նպատակով:

Նորից նշենք, որ այս գնահատականները ոչ թե Հայաստանի ընդդիմության կամ Ռուսաստանի ներկայացուցիչների տվածներն են, այլ ԵԱՀԿ ԺՀՄԻԳ-ի միջազգային դիտորդներինը: Եվ այդ գնահատականները անտեսվում են Եվրամիության իշխող վերնախավի կողմից, ինչը ևս մեկ անգամ վկայում է այն բանի մասին, որ ԵՄ-ն հետաքրքրված չէ Հայաստանում ժողովրդավարական գործընթացների զարգացմամբ: Եվրամիությունը, խրախուսելով Փաշինյանի բռանպետական հակումները, բացառապես մեկ  նպատակ է հետապնդում. Հայաստանը դարձնել մանրադրամ՝ Ռուսաստանի դեմ իր հակամարտության մեջ:
Սա է իրականությունը:

Արտակ Հակոբյան   
Zham.am