Հունիսի 7-ի ընտրությունների գլխավոր մարտահրավերը՝ ընտրողների պասիվությունը

«Ժողովուրդ» օրաթերթը գրում է. «Հունիսի 7-ին նախատեսվող ընտրություններին ընդառաջ քաղաքական դաշտում առավել հաճախ բարձրաձայնվող խնդիրներից մեկը ընտրողների պասիվության միտումն է։ Իշխանության ղեկավար Նիկոլ Փաշինյանի հիմնական մրցակիցները վերջին շաբաթներին արձանագրում են, որ հանրության զգալի հատվածը պարզապես չի ցուցաբերում ընտրություններին մասնակցելու ցանկություն․ և գյուղերում, և մայրաքաղաքում, և խոշոր քաղաքներում։

«Ժողովուրդ» օրաթերթի տեղեկություններով՝ ընդդիմադիր գրեթե բոլոր շտաբներում այս հանգամանքը դիտարկվում է որպես առանցքային մարտահրավեր։ Նրանց գնահատմամբ՝ ընտրողների ցածր մասնակցությունը, հատկապես Երևան քաղաքի օրինակով, կարող է աշխատել գործող իշխանության օգտին։ Հիշեցնենք, որ Երևանի 824.250 ընտրելու իրավունք ունեցող քաղաքացիներից միայն 234.553-ը, կամ 28,43%-ը, մասնակցեց քվեարկությանը։ Սա երբևէ գրանցված ամենացածր ցուցանիշն է։ Արդյունքում, մոտ մեկ մլն բնակչություն ունեցող մայրաքաղաքում շուրջ 75 հազար ձայն հավաքած Տիգրան Ավինյանը կառավարում է մայրաքաղաքը։

Ընդդիմադիր շրջանակներում տարածված է համոզում՝ սահմանափակ թվով ընտրողների մասնակցության պայմաններում ընտրատեղամասեր կգնան հիմնականում այն քաղաքացիները, որոնց մասնակցությունը հաճախ կապվում է վարչական ռեսուրսների ազդեցության հետ։ Արդյունքում, թեկուզ մասնակցության համեմատաբար ցածր տոկոսով, հնարավոր է ձևավորվի բարձր ձայների հարաբերակցություն գործող իշխանության օգտին, ինչը կարող է հանգեցնել Նիկոլ Փաշինյանի վերընտրությանը։

Ստեղծված իրավիճակում ընդդիմադիր շտաբները, ըստ Ժողովուրդ օրաթերթի աղբյուրների, իրենց հիմնական ջանքերը կենտրոնացնում են մեկ առանցքային խնդրի վրա՝ ընտրության օրը հնարավորինս մեծ թվով քաղաքացիների դուրս բերել իրենց տներից և ապահովել նրանց մասնակցությունը քվեարկությանը։ Նրանց համոզմամբ՝ հենց մասնակցության մակարդակն է որոշիչ լինելու ընտրությունների արդյունքների տեսանկյունից»։