Փաշինյանը խիստ վատ է տանում Արցախ բառն անգամ

Ճի՞շտ ենք հասկանում, որ ով Արցախ անունը տվեց, դա համարվելու է Հայաստանի վարած արտաքին քաղաքականությանը դեմ քաղաքականություն, ասենք, մեկն ասի՝ տատս, պապս Արցախից են եղել, դրանից հետո գործից ազատվելու է կամ ինչ-որ ճնշումների է ենթարկվելու։ Այս մասին այսօր՝ մարտի 12–ին, կառավարությունում վարչապետ Նիկոլ Փաշինյանին դիմեց լրագրողներից մեկը՝ անդրադառնալով Փաշինյանի հայտարարությանը, որ պատարագի ժամանակ հնչեցվում է «Արցախի Հանրապետություն» արտահայտությունը, դա պատերազմի կոչ է։

Ի պատասխան Փաշինյանն ասաց. «Ես շատ հստակ ասեցի որ պետության մեջ չի կարող լինել երկու արտաքին քաղաքականություն. մարդիկ կարող են ասել՝ Արցախից եմ Վանից եմ Մուշից եմ Մոսկվայից եմ Բեռլինից եմ, չգիտեմ, Մինվոդիից եմ, դա ի՞նչ կապ ունի իմ ասած թեմայի հետ։ Մարդը ինչ ուզում է՝ կարող է ասել, խոսքը պետական պաշտոնյայի դերաբաշխման մասին է, և քաղաքական գնահատականի մասին։

Ես ասում եմ՝ եկեղեցու խորանից ասում են՝ օրհնի Արցախի Հանրապետությունը, և այստեղ ես ոչ թե իրավական գնահատական եմ տալիս, այլ քաղաքական։ Ես ասում եմ, որ Կտրիճ Ներսիսյանը ստանձնել է պատերազմի կուսակցության առաջնորդությունը Հայաստանում։

Ես ա ասում եմ նաև ուրիշ տեսակետից, Հայաստանյաց առաքելական Սուրբ եկեղեցու պատարագում 40-ից ավել անգամ խաղաղություն բառը օգտագործվում է, ընդ որում չորս թե հինգ անգամ ընդգծելով՝ Տեր Աստված տուր աշխարհին խաղաղություն։ Սա ևս մեկ օրինակ է, որ այդ մարդիկ հոգևոր ծառայության հետ ընդհանրապես կապ չունեն»։

Ինչ վերաբերում է նրան, որ Ցեղասպանության թանգարան–ինստիտուտի տնօրենն ազատվել է պաշտոնից ԱՄՆ փոխնախագահին Արցախի վերաբերյալ գիրք նվիրելու համար, վարչապետն ասաց. «Արարողակարգային նվեր տալ Արցախյան հիմնախնդիր թեմայով, դա, քաղաքական սադրանք է, չի կարող այդպիսի բան լինել։ Այսինքն նվեր տալու բան կա, մենք չենք կարում նվեր տա՞նք, վախենում ենք, ուրիշ պաշտոնյայի միջոցով պետք է նվեր տա՞նք։

Լսեք, կա պետություն արարողակարգ, հերիք է մենք մեր երկրին վերաբերվենք որպես ինքնագործունեության խմբակի։ Ես չեմ կարող այդպիսի բան թույլ տալ, որովհետև պետության թիվ մեկ պատասխանատուն եմ»։
Աղբյուր՝ News.am