Փաշինյանի ջղային արձագանքը քաղաքացու՝ Արցախի ու Կաթողիկոսի մասին հարցերին

Արթիկում քաղաքացիների հետ հանդիպման ժամանակ ներկաներից մեկը Նիկոլ Փաշինյանին հարց ուղղեց՝ «որպես հայ և որպես վարչապետ ընդունո՞ւմ եք, որ Արցախը հայկական տարածք է եղել»։

Փաշինյանն ասաց. «Հայկական տարածքի խոսք չէ։ Ես ասել եմ Ադրբեջանի հետ խաղաղություն ենք հաստատել 1991 թվականի Ալմաթայի հռչակագրի հիման վրա, ինչը նշանակում է անկախ Հայաստանի տարածքը Հայաստանի Խորհրդային սոցիալիստական հանրապետության տարածքն է, իսկ անկախ Ադրբեջանի տարածքը՝ Ադրբեջանի խորհրդային սոցիալիստական հանրապետության տարածք։ Քանի որ Խորհրդային միության ժամանակ Լեռնային Ղարաբաղի ինքնավար մարզը եղել է  Ադրբեջանի տարածքում, մենք ճանաչել ենք Ղարաբաղը որպես Ադրբեջանի մաս»։

Քաղաքացին նշեց, որ այլ քարտեզներ են եղել, ՀՀ -ն,  ի սկզբանե,  երբ ճանաչվել է  անկախ պետություն...

Փաշինյանն ընդհատեց քաղաքացուն՝ նշելով, որ սուտ է։

«Սուտ չի կարող լինել։ 1994 թվականին ունեցել ենք հստակ քարտեզ»,- ասաց քաղաքացին։

Քաղաքացին հարց ուղղեց նաև Ամենայն Հայոց Կաթողիկոսի մասին. «Հայաստանում օրենք կա՞, որ կարող եք Կաթողիկոսին կարգել, չէ որ նա նախարար չէ, որ կարողանաք հանել ու նշանակել»։

Մեկ այլ քաղաքացի նշեց. «Դե լավ տղա ջան, դա կարևոր չէ»։ 

Փաշինյանն արձագանքեց. «Լսի մի րոպե, լսի ինչ եմ ասում... Մի րոպե սպասի։ Հայաստանում Կաթողիկոս չկա։ Կտրիճ Ներսիսյանը Կաթողիկոս չէ»։

Քաղաքացի. «Կա»։

Փաշինյան. «Քեզ համար Կաթողիկոս է, ինձ համար չէ։ Դուք հայ ազգը չեք ներկայացնում։ Դուք կարաք ներկայացնեք միայն ձեզ,  ես ներկայացնում եմ Հայաստանի Հանրապետությունը։ Ես եմ հարյուր հազարավոր հայ ժողովրդի  ներկայացուցիչը, իրենք քվեարկել են իմ օգտին»։

Աղբյուրը ` Panorama.am