Տարօրինակ է. Զախարովան` երկաթուղու կառավարման վերաբերյալ Փաշինյանի հայտարարության մասին (տեսանյութ)

Հայաստանի երկաթուղիների ռուսական օպերատորը ոչ թե զրկում է մրցակցային առավելություններից, այլ ստեղծում է դրանք։ Ճեպազրույցի ժամանակ պատասխանելով Sputnik Արմենիայի հարցին՝ այս մասին ասել է ՌԴ ԱԳՆ պաշտոնական ներկայացուցիչ Մարիա Զախարովան։

Ավելի վաղ Նիկոլ Փաշինյանը Ռուսաստանին առաջարկել էր երկաթուղիների կոնցեսիոն կառավարումը վաճառել Երևանի և Մոսկվայի հետ բարեկամ երկրի: Նա կարծում է, որ մի շարք երկրների հետ Ռուսաստանի լարված հարաբերությունների պայմաններում Ռուսաստանի կողմից հայկական երկաթուղու կառավարումը բացասաբար է ազդում նրա մրցունակության վրա:

Զախարովայի խոսքով՝ Փաշինյանի հայտարարությունները տարօրինակ են և«քիչ թույլատրելի»:

«Ռուսաստանը միշտ կողմ է եղել տարածաշրջանային բոլոր տրանսպորտային և տնտեսական կապերի ապաշրջափակմանը։ Եվ դրա համար շատ–շատ բան է արվել Ռուսաստանի, Հայաստանի և Ադրբեջանի փոխվարչապետների համանախագահությամբ եռակողմ աշխատանքային խմբի շրջանակներում»,-ասել է Զախարովան։

Նա նշել է, որ Հայաստանի երկաթուղային ցանցը «Հարավկովկասյան երկաթուղի» ՓԲԸ-ի կառավարման ներքո է արդեն ավելի քան 20 տարի:

Հայաստանը երկաթուղային ենթակառուցվածքը «Հարավկովկասյան երկաթուղու» կոնցեսիոն կառավարման է հանձնել 2008 թ. փետրվարին՝ 30 տարի ժամկետրով և ևս 10 տարով երկարացնելու իրավունքով: