Հայաստանը դրել են աշխարհաքաղաքական հակադրությունների զոհասեղանին, մեր երկիրը դարձրել են խոշորների բախման թատերաբեմ․ Դերենիկ Մալխասյան (տեսանյութ)

«Մայր Հայաստան» կուսակցության վարչության անդամ Դերենիկ Մալխասյանի ելույթը կուսակցության համաժողովում։

***

Հայաստանի առաջ ծառացած մարտահրավերները գոյաբանական բնույթ ունեն: Օրակարգում լինել-չլինելու հարցն է: Ներքին ու արտաքին խնդիրները միախառնված են և լուծումներ են պահանջում: Ալիև Հայաստանը դիտարկում է որպես արևմտյան Ադրբեջան: Պաշտոնական Երևանը սպասարկում է Ալիևի ծրագրերը:

Օրվա իշխանությունների վարած քաղաքականությունը հիմնական մարտահրավերներից մեկն է: Մեր ժողովրդին խաբում են, թե, իբր, խաղաղություն են բերել, բայց դա մեծագույն խաբեություն է:

Խաղաղությունը խոսքերով չի լինում: Խաղաղությունը միակողմանի ու անվերջ զիջումներով չի լինում: Խաղաղությունը մուրալով չի լինում: Խաղաղությունը ինքնախաբեությամբ կամ ավելի ճիշտ՝ ժողովրդին խաբելով չի լինում:

Մենք պետք է մեր հին ու նորագույն պատմությունից դասեր քաղենք:

Երբ մեր ստեղծագործական թիմը նկարահանում էր «Կեղծ խաղաղության գինը» ֆիլմը 100 տարի առաջ մեզ հետ տեղի ունեցածի վերաբերյալ, ինձ մոտ դեժա վյուի էր: Առաջվա պատկերները այսօրվա իրադարձություններն էին հիշեցնում:

Հիմա նույնը տեղի է ունենում մեր օրերում: Էլի կեղծ պատրանքներ, կեղծ հույսեր, անմիաբանություն և կորուստներ: Բայց կա մեկ էական տարբերություն: Եթե 100 տարի առաջ կար փորձի պակաս, ռոմանտիզմ, միամտություն, ապա հիմա ամեն ինչ գիտակցված է արվում:

Նիկոլ Փաշինյանն Արցախը գիտակցված ու դավադրաբար հանձնելուց հետո անցել է Հայաստանին: Եվ այդ ամենը հանուն աթոռի, հանուն սեփական կաշվի փրկության:

Հիմա Հայաստանը դրել են աշխարհաքաղաքական հակադրությունների զոհասեղանին, մեր երկիրը դարձրել են խոշորների բախման թատերաբեմ ու հանել աճուրդի:

Հարգելի՛ քաղաքացիներ,

Մեզ իրական ու երաշխավորված խաղաղություն է պետք: Իսկ դա հնարավոր չէ ՔՊ-ական իշխանության պարագայում:

«Մայր Հայաստանը» ունի երաշխավորված խաղաղություն ապահովելու իր հստակ պատկերացումները: Դրանք կյանքի կոչելու համար մեզ քաղաքական փոփոխություններ են պետք:

Առաջիկա խորհրդարանական ընտրություններն այդ առումով ճակատագրական նշանակություն են ունենալու: Մենք պետք է համախմբված լինենք: Պառակտված հասարակությունը հարմար թիրախ է թշնամիների համար: Մեզ անհրաժեշտ է միասնականություն, վճռականություն, սկզբունքայնություն, կամք: Մենք այդ ամենն ունենք: Կոչ ենք անում մեր ժողովրդին միանալ: Միանալ, որ փոխել: