Պանդորայի արկղը դուք եք բացել, պատմական սխալ եք թույլ տվել. Արա Զոհրաբյանը՝ դատավորին

Արմավիրի մարզի առաջին ատյանի ընդհանուր իրավասության դատարանում, դատավոր Էդգար Հովհաննիսյանի նախագահությամբ, շարունակվում է  Արման Սարոյանը՝ (Մասյացոտնի նախկին առաջնորդ Գևորգ եպիսկոպոս Սարոյան) ընդդեմ Հայաստանյայց Առաքելական Սուրբ Եկեղեցու գործով դատական նիստը։

Հայցվոր Արման Սարոյանի պահանջն է՝ «ճանաչել անվավեր հայցվորին Մասյացոտնի թեմի առաջնորդի պաշտոնից ազատելու մասին Գարեգին Բ Ամենայն Հայոց Կաթողիկոսի հունվարի 10-ի  թիվ 02 հայրապետական տնօրինությունը՝ որպես հետևանք հայցվորին վերականգնելով Մասյացոտնի թեմի առաջնորդի պաշտոնում»:

Մայր Աթոռի ներկայացուցիչ Արա Զոհրաբյանը դատական նիստի ընթացքում հայցի ապահովման միջոցը վերացնելու միջնորդությամբ հանդես եկավ։ Նրա ներկայացմամբ, սույն վեճը ենթակա չէ դատարանում քննության՝ մեջբերելով Հայաստանի Սահմանադրության, օրենքների տարբեր հոդվածներ, ըստ որի  Հայաստանի Հանրապետությունը ճանաչում է  Հայաստանյանց Առաքելական սուրբ եկեղեցու ինքակառավարումը իր նվիրապետության  սահմաններում, պետությունը չի կարող միջամտել եկեղեցու ներքին կյանքին, հետևաբար չի կարող դատական վերահսկողության դառնալ եկեղեցու ներքին  հարցերով առաջացած վեճը։ 

«Դրա մասին է խոսում նաև այն փաստը, որ Ամենայն Հայոց Կաթողիկոսը եկեղեցական պաշտոնից զրկել է Գևորգ եպիսկոպոս Սարոյանին, իսկ հայցը ներկայացրել է Արման Սարոյանը։ 

Քաղաքացիական դատավարության օրենսգրքի  126 հոդվածը սահմանում է՝ դատարանը մերժում է հայցադիմումի ընդունումը, եթե գործը ենթակա չէ քննության»,- ասա Զոհրաբյանը։ 

Նա նաև ընդգծեց, որ առկա չէ հայցի ապահովման միջոցներ կիրառելու հիմքերը։ 

Զոհրաբյանը նշեց, որ հայցի ապահովման միջոցը համաչափ չէ ներկայացված պահանջին. «Հայցի ապահովման միջոցը պետք է համաչափ լինի ներկայացված պահանջին և  հայցի ապահովմամբ հետապնդվող նպատակին։ Հայցորը դատարանից խնդրել է  տնօրինությունն անվավեր ճանաչել, որն այս պահի դրությամբ գործող տնօրինություն է, արդեն իսկ առաջացրել է իր հետևանքը, այսինքն հայցորը չի հանդիսանում Հայ Առաքելական Սուրեբ եկեղեցու Մասյացոտնի թեմի առաջնորդ։ Այս պարագայում դատարանը որպես հայցի ապահովման միջոց պաշտոն չունեցող անձին, ըստ էության, լիազորել է կատարելու այդ պաշտոնի գործառույթները, որոնք մեծ մասամբ կրոնական, հոգևոր նշանակություն ունեն։

Ընդ որում, դատարանը փորձել է նաև ֆինանսական գործարքներ կատարելու իրավունք շնորհել հայցվորին, որի իրավունքը վերջինս չունի»։ 

Արա Զոհրաբյանը հայտարարեց, որ դատարանի որոշման հիման վրա այս ընթացքում Արման Սարոյանը Մասյացոտնի թեմի հաշիվներից բանկային գործարքներ է կատարել ու դա արել է դատարանի որոշման հիման վրա։

«Սա բերելու է շատ լուրջ խնդիրների։ Հիմա մեր միջնորդությամբ խնդրում ենք՝ վերացնել այս հայցի ապահովումը։ Եթե դատարանը, ինչ-ինչ պատճառներից ելնելով, հավատացեք՝ մենք գիտենք՝ ինչ պատճառներով...

Ձեզ բացարկ չենք հայտնում, թեև հիմնավոր կասկածներ ունենք, որ չեք գործում ձեր անկախ կամքով,  որովհետև ձեր անկախ կամքով գործելու դեպքում հայցադիմումը վարույթ չէիք ընդունի, որովհետև չի կարող Ամենայն Հայոց կաթողիկոսի տնօրինության հարցում դատական վերահսկողություն լինել»,- նշեց Զոհրաբյանը։

Ըստ նրա, դատարանը շատ լուրջ խախտում է թույլ տվել, որին հետևելու է օրենքով սահմանված պատասխանտվություն. «Պատմական շատ վտանգավոր նախադեպ եք ստեղծում։

Ուղիղ արգելված է,  որ պետությունը՝ իր բոլոր իշխանության թևերով, վերահսկի  եկեղեցու ներքին կյանքը։

Օրենքը ձեր առջև դուռ է փակում, որ մտնեք  եկեղեցու ներքին կյանք։ Դուռը դուք եք բացել, այդ պանդորայի արկղը դուք եք բացել։ Դուք պատմական բան եք արել, վստահ եղեք՝ ապագայում ձեր արածը դառնալու է պատմական քննարկման առարկա, դուք պատմական սխալ եք թույլ տվել»,- նշեց Զոհրաբյանը։ 

Հայցի ապահովման միջոցը վերացնելու մասով դատական ակտը հրապարակվի փետրվարի 11-ին։ 

Լրագրողների հետ զրույցում Արա Զոհրաբյանն ասաց, որ դատարանն անհարկի միջամտել է եկեղեցու ներքին կյանքին,  որի իրավունքը չունի։ 
Աղբյուրը` Panorama.am