Այլևս մրցանակային «եղբայրներ». Ալիև-Փաշինյան

 Նիկոլ Փաշինյանը և Իլհամ Ալիևը Աբու Դաբիում ստացել են «Զայեդ» մարդկային եղբայրության մրցանակը։

Մինչ մրցանակը ստանալու արարողությունը երկու երկրների առաջնորդները հանդես էին եկել ելույթով ու խոսել էին Հայաստանի ու Ադրբեջանի միջև հաստատված խաղաղության մասին։
--
Մեր կողմից նկատենք, որ այս երկու գործիչները հիմնական պատասխանատուներն են 2020 թվականի սեպտեմբերի 27-ին ծավալված պատերազմի, որի հետևանքով զոհվել են հազարավոր հայ և ադրբեջանցի զինվորներ, տասնյակ հազարավորները վիրավորվել են և հաշմվել, սպանվել և տուժել են հարյուրավոր խաղաղ բնակիչներ:
Ավելին, այս երկու գործիչների վարած քաղաքականության հետևանքով ադրբեջանական կողմը ցեղասպանություն է իրականացրել Արցախի բնիկ հայ բնակչության նկատմամբ, հայրենազրկվել են շուրջ 150 հազար արցախցի հայեր, որոնք ֆիզիկական բնաջնջման սպառնալիքի տակ ու պայմաններում հարկադրված են եղել բռնագաղթել հազարամյակներով հայկական Արցախից: 
Ադրբեջանական իշխանությունները, Ալիևի գլխավորությամբ ու հրահանգով, համակարգված ոչնչացնում են Արցախի հայկական պատմական ու մշակութային ժառանգության հուշարձանները: 
Ավելին, 2021, 2022 և 2023 թվականներին ադրբեջանական կողմը մարտական գործողություններ է իրականացրել ինչպես Արցախի, այնպես էլ՝ բուն Հայաստանի Հանրապետության դեմ: Այդ մարտական գործողությունների ժամանակ ևս եղել են հարյուրավոր զոհեր, վիրավորներ: Ադրբեջանը մինչ օրս զավթած ՀՀ տարածքներից զորքերը դուրս չի բերել: 
Բացառապես ազգային պատկանելությամբ պայմանավորված՝ Ալիևը այսօր պատանդ է պահում տասնյակ հայ մարդկանց, այդ թվում՝ Արցախի ռազմաքաղաքական ղեկավարության բազմաթիվ ներկայացուցիչների: Պետական մակարդակով իրականացվում է հայատյացության սերմանում և Հայաստանը զավթելու գաղափարախոսության քարոզչություն:  
Ու պետք է կամ բացարձակապես տհաս, կամ համակողմանի ցինիկ լինես, որպեսզի այդ ամենը կոչես «խաղաղություն», դեռ մի բան էլ՝ մրցանակ շնորհես:  
Ու ստացվում է, որ եթե մեկ մարդ սպանես, ապա բանտ կընկնես, բայց եթե հազարավորների մահվան մատնես, ապա քեզ կծափահարեն և մրցանակ կտան: 
Ընդսմին. Ալիևն ու Փաշինյանը այլևս մրցանակային «եղբայրներ» են: 
Այսինքն, հունիսին Հայաստանում ցանկանում է վարչապետ մնալ և ընտրություններում ամեն գնով վերարտադրվել Ալիևի մրցանակային «եղբայրը»: