Բժիշկը հիվանդին կհասնի մոտոցիկլով. նոր նախագիծ

Հայաստանի շտապօգնության ծառայության կազմում կներդրվեն հատուկ մոտոմիավորներ, որոնք կգործեն բժշկական կազմակերպությունից դուրս պայմաններում։ 

Առողջապահության նախարարության մշակած նախագծով առաջարկվում է սահմանել այս նոր ստորաբաժանումների գործունեության իրականացման պայմաններն ու պահանջները։ 

Panorama.am-ն ուսումնասիրել է նախագիծը։ Այսպես,  նախագծի ընդունմամբ՝ ավանդական շտապօգնության մեքենաներին զուգահեռ, փողոցներում կհայտնվեն բժշկական մոտոցիկլներ՝ հագեցած անհրաժեշտ սարքավորումներով։

Նախագծի հիմնավորման մեջ հատուկ ընդգծվում է, որ այս նորարարությունը ոչ թե պարզապես հարմարավետություն է, այլ կյանքեր փրկելու գործիք։

«Մոտոմիավորի անհրաժեշտությունը պայմանավորված է ժամանակի կենսական նշանակությամբ։ Շտապ օգնության համակարգում յուրաքանչյուր րոպեն կարող է վճռորոշ լինել, իսկ խիտ երթևեկությունը, նեղ փողոցները և դժվարանցանելի բակային տարածքները հաճախ խոչընդոտում են շտապօգնության մեքենաների արագ հասնելուն։ Մոտոցիկլով աշխատող բժիշկը կարող է շրջանցել խցանումները, ճկուն անցնել ամենադժվար հատվածներով և հիվանդին հասնել զգալիորեն արագ։

Այս արագ արձագանքումը որոշ դեպքերում բառացիորեն կյանքի արժեք ունի, հատկապես սրտի կանգի, ծանր ալերգիկ ռեակցիայի կամ ուժեղ արյունահոսության ժամանակ»։

 Մոտոմիավորը ներկայացվում է որպես լիարժեք մասնագիտական ստորաբաժանում, որի հնարավորությունները նախագծում նկարագրվում են հետևյալ կերպ. «Բժիշկը տեղում կարող է վերահսկել կենսական ցուցանիշները, ապահովել շնչուղիների անցանելիությունը, նվազեցնել վտանգավոր արյունահոսությունը և իրականացնել առաջնային բժշկական օգնության կարևոր քայլերը։ Սա ապահովում է, որ օգնությունն սկսվի այն պահին, երբ ամենաշատն է պետք, մինչ հիմնական շտապօգնության մեքենան դեռ ճանապարհին է»։

Բացի բժշկական արդյունավետությունից, նոր ստորաբաժանումների ներդրումը նպատակ ունի օպտիմալացնել ողջ համակարգի աշխատանքը։ Նախագծի հեղինակները շեշտում են, որ սա կօգնի ավելի ճիշտ բաշխել առկա ռեսուրսները։

«Ավելի թեթև և շարժուն այս ստորաբաժանումները նվազեցնում են հիմնական մեքենաների ծանրաբեռնվածությունը, հնարավորություն տալիս, որ դրանք կենտրոնանան առավել լուրջ և տեղափոխում պահանջող դեպքերի վրա։ Այս մոտեցումը բարձրացնում է ծառայության ընդհանուր արդյունավետությունն ու օպերատիվությունը՝ առանց մեծածավալ լրացուցիչ ներդրումների»։

Հատկանշական է, որ նախագծի ընդունումը պետական բյուջեում ծախսերի կամ եկամուտների էական փոփոխություն չի նախատեսում։
Լուսանկարը ստեղծված է ԱԲ միջոցով։