Գարեգին Բ Ամենայն Հայոց Կաթողիկոսի օրհնությամբ լույս է տեսել Արմինե Տիգրանյանի՝ Արցախի մշակութային Ժառանգությանը նվիրված մենագրություն

Օրհնությամբ Ն.Ս.Օ.Տ.Տ. Գարեգին Բ Ծայրագույն Պատրիարք և Ամենայն Հայոց Կաթողիկոսի՝ Մայր Աթոռ Սուրբ Էջմիածնի հրատարակչությունը լույս է ընծայել պ․գ․թ․ Արմինե Տիգրանյանի «Արցախի մշակութային Ժառանգության ոչնչացման և բռնայուրացման՝ Ադրբեջանի քաղաքականությունը (2020-2025 թթ․)» ուսումնասիրությունը։

Մայր Աթոռ Սուրբ Էջմիածնի հրատարակչությունից հայտնում են, որ ույն ուսումնասիրությամբ հեղինակն անդրադարձել է 2020-2025 թթ․ Ադրբեջանի սանձազերծած պատերազմների, էթնիկ զտման և ռասայական խտրականության հետևանքով Արցախի պատմական հայկական մշակութային ժառանգության համակարգված ոչնչացման և յուրացման քաղաքականությանը, մշակութային ժառանգության միջազգային պաշտպանության գործիքակազմին։

Մենագրության մեջ քննվում են զինված հակամարտությունների ժամանակ մշակութային արժեքների պաշտպանության միջազգային համակարգը, Ադրբեջանի կողմից 44-օրյա պատերազմի ընթացքում և դրանից հետո Արցախի հայկական մշակութային ժառանգության՝ միջազգային սկզբունքների դիտանկյունից անօրինական թիրախավորման դեպքերը, դրա ոչնչացման և յուրացման միջոցները: Ներկայացվում են մշակութային արժեքների պաշտպանության միջազգային կանոնակարգերը, իրավական և հումանիտար գործիքակազմը (միջազգային կոնվենցիաներ, հռչակագրեր, բանաձևեր, կանոնադրություններ, սովորութային նորմեր)՝ ի պաշտպանություն Ադրբեջանի կողմից վանդալիզմի ենթարկված Արցախի հայկական մշակութային ժառանգության։ Ակադեմիական հոդվածների, գրքերի, ՅՈՒՆԵՍԿՕ-ի, ՄԱԿ-ի, ԻԿՕՄՕՍ-ի, Եվրոպայի խորհրդի, Եվրոպական խորհրդարանի բանաձևերի, Հռոմի կանոնադրության, տեսական և իրավական համապատասխան փաստաթղթերի ուսումնասիրությունը հնարավորություն է տվել գտնելու Արցախի մշակութային ժառանգության պաշտպանության ուղիները՝ համամարդկային արժեքների պահպանության կարևորության, անկախ քաղաքական իրավիճակից միջազգային հումանիտար իրավունքի գործարկման, մշակույթի իրավունքի հարգման շարակարգում։

Panorama.am-ի հետ զրույցում Արմինե Տիգրանյանն անդրադառնալով Արցախի մշակութային ժառանգության պաշտպանության ուղիներին, ասաց, որ դրանք հիմնականում միջազգային օրենքներն են, միջազգային իրավունքը, որոնք դատապարտում են մշակութային ժառանգության դեմ ցանկացած հանցագործություն, անկախ նրանից, թե այդ ժառագությունը որտեղ է գտնվում, ում է պատկանում։

«Ժառանգության պահպանությունը պետք է վեր լինի ցանկացած միջպետական, քաղաքական խնդիրներից։ Ժառանգության պահպանությունը համընդհանուր պարտավորություն է, որը վերաբերում է  բոլորին, որի ժառանգորդը սերունդներն են։ Մեր պարտքն է  ժառանգությունն անխաթար փոխանցել ապագա սերունդներին, պահպանել այն իրենց կրած ողջ ինֆորմացիայով, բովանդակությամբ, քանի որ սա է սերունդների դաստիարակման բանալին»,- նշեց Ա. Տիգրանյանը։

Նա ընդգծեց, որ Արցախի մշակութային ժառանգությունն իրականում ունի պահպանության լիարժեք հնարավորություններ՝ անկախ որպես առանձին պետություն ճանաչված լինել կամ չլինելու փաստից, որովհետև ժառանգությունը  պահպանվում է  որպես ժողովուրդների սեփականություն, այս դեպքում որպես Արցախի ժողովրդի սեփականություն։

«Միջազգային իրավունքը ժառանգության իրավունքը դիտում է  որպես մարդու մշակույթի իրավունք և այս կոնցեպտում այն պահպանվելու լիարժեք հնարավորություններ ունեն։

Մարդու մշակույթի իրավունքն է անարգել մուտք ունենալ իր ժառագության տարածքներ, հաղորդակցվել այդ արժեքների հետ, զարգանալ այդ արժեքներով ու այն փոխանցել սերունդներին»,- ասաց Արցախի մշակութային Ժառանգության ոչնչացման և բռնայուրացման՝ Ադրբեջանի քաղաքականությունը (2020-2025 թթ․)» մենագրության հեղինակ Արմինե Տիգրանյանը։

Մենագրությունը նախատեսված է մշակութային ժառանգության պահպանությամբ զբաղվող մասնագետների, պետական կառույցների, գիտական հաստատությունների, ուսանողների և արցախահայության մշակութային ժառանգության պաշտպանությամբ ու պահպանությամբ մտահոգ ընթերցողների լայն շրջանակի համար։