Հայկ Սարգսյանը մեղադրեց Ալեն Սիմոնյանին խաղային ոլորտի օլիգարխներին լոբբինգ անելու մեջ, որի արդյունքում նա կարող է զրկվել ՔՊ-ի ցուցակում լինելուց

Գալիք տարվա ընտրություններից առաջ, անհանգիստ վիճակում են ոչ միայն ընդիմության շրջանում, այլև՝ ՔՊ-ում:

 ՔՊ-ում հակասություններն առաջ են եկել ոչ միայն իրենց հերթական համագումարում  կուսակցության բարձր տեղերում հայտնվելու համար: Այդ խնդիրն իհարկե առկա է՝ հաշվի առնելով գալիք տարվա սպասվող ընտրությունների գործոնը:

Ի վերջո, այդ ընտրությունների արդյունքում ԱԺ պատգամավոր դառնալը կարևոր է նաև իրենց հետագայի համար: Ո՞վ գիտի, թե ինչ է լինելու այդ ընտրությունների արդյունքում ՔՊ-ի հետ:

Սակայն, բացի այդ խնդրից, ՔՊ-ում բախվում են նաև այլ  շահեր: Օրինակ,  ջրի երես են դուրս եկել ՔՊ-ական  Ալեն Սիմոնյանի և մեկ այլ ՔՊ-ական՝  Հայկ  Սարգսյանի միջև տարաձայնությունները:

Այս  տարվա   սեպտեմբերին,  ՔՊ վարչությունն ԱԺ նախագահ Ալեն Սիմոնյանի դիմումի հիման վրա ԱԺ պատգամավոր Հայկ Սարգսյանի նկատմամբ հարուցել էր կարգապահական վարույթ, որի արդյունքում վերջինիս հայտարարվել էր խիստ նկատողություն։

Ըստ Սարգսյանի՝ Ալեն Սիմոնյանն իր  նկատմամբ կարգապահական վարույթ սկսելու մասին դիմել էր  ՔՊ վարչությանը  դեռ  2024 թվականի մարտի 4-ին։ Դա այն օրն էր, երբ ԱԺ-ում քննարկվում էր իր  կողմից շրջանառության մեջ դրված օրենքի նախագծերի  փաթեթը, որով նախատեսվում էր երկու անգամ բարձրացնել խաղային ոլորտի հարկային բեռը։

Սարգսյանը փաստացի ակնարկում էր, որ Ալեն Սիմոնյանը բացահայտ լոբբիստական գործնեությամբ է զբաղված ԱԺ-ում՝ այս ոլորտի բիզնեսի շահերի պաշտպանության համար: Այն, որ դա այդպես է, գիտեն բոլորը:

Նշենք, որ երկրի ՀՆԱ-ի կառուցվածքում այս ոլորտը զգալի տեղ է զբաղեցնում և փորձագետների կարծիքով, այդ ոլորտի շրջանառությունը տարեկան  միլիարդավոր  դոլարների է հասնում: Առնվազն, գոնե այս ոլորտում գործող գործարարներից մեկի տարեկան շրջանառությունը մոտ 10 միլիարդ դոլարի է հասնում:

Հետաքրքիր է, որ այս տարվա ապրիլին նույնանման առաջարկով նույն Հայկ Սարգսյանը դիմել էր ՔՊ-ին՝ Ալեն Սիմոնյանի հանդեպ նման որոշում կայացնել, սակայն նրան չէր հաջողվել սեփական կուսակցությանը համոզել, որ օլիգարխիայի ներկայացուցիչը պատժվի:

Իսկ այսօր հայտնի դարձավ, որ Հայկ Սարգսյանին ՔՊ-ի վարչությունը, նույնիսկ,  չի ուզում թույլ տալ առաջադրվել  գալիք ընտրություններին ՔՊ-ի ցուցակում:

ՔՊ-ի վարչության որոշումը հասկանալի է. անցել են արդեն ռոմանտիկ ժամանակները, երբ կարելի էր մարդկանց խաբել՝ «արդար Հայաստանե  խոստանալով:

Այսօր Փաշինյանին պետք են մեծ գումարներ՝ ընտրություններում օգտագործելու համար: Այդ իսկ պատճառով, նա չի կարող զոհաբերել նորահայտ և հին օլիգարխների  շահերը, հանուն հիպոթետիկ «արդարությանե, մանավանդ, որ այսօր նրան այլևս չեն վստահում, իսկ վարկանիշը տատանվում է 15 տոկոսի մոտ:

Գալիք ընտրությունների համար, պետք են մեծ փողեր և բացահայտ հակապետական և հակահայկական գործիչներ, ովքեր ավելորդ հույզերով չեն արտահայտվի, եթե պետք լինի Ադրբեջանին զիջել նոր տարածքներ:

Իսկ որ դրան է պատրաստվում Փաշինյանն, արդեն գիտեն, հանրության մեծ մասը և  առնվազն իր մերձավոր շրջապատը:

Հավանաբար, դա Հայկ Սարգսյանին հայտնի չէ, և նա հին հովերով տարված, դեռ մտածում է, թե իր նախկին ավանդը սեփական կուսակցության մեջ, պիտի ինչ-որ դեր կատարի, որ նրան թույլ տան առաջադրվելու և գալիք ընտրություններում հարազատ կուսակցության ցուցակում տեղ զբաղեցնելու համար: Չգիտակցելով, որ 2026-ին բոլորին այլ ընտրություն է լինելու, որտեղ Փաշինյանի համար այլ գործոններ են պետք լինելու և, այդ տեսանկյունից, Հայկ Սարգսյանի նման մարդկանց անհրաժեշտությունն այլևս չի լինելու:

Սա  է իրականությունը:

Դավիթ Մկրտչյան

 Zham.am