«Թրամփի ուղին» ոչնչով չի տարբերվում «զանգեզուրյան միջանցքից» և ԻԻՀ-ն կտրականապես դեմ է դրան. Ալի Աքբար Վելայաթի

Իսլամական հեղափոխության առաջնորդի միջազգային հարցերով ավագ խորհրդական Ալի Աքբար Վելայաթին հայտարարել է, որ Իրանը դեմ է ԱՄՆ նախագահ Դոնալդ Թրամփի կովկասյան ծրագրին, քանի որ այն լուրջ սպառնալիք է ներկայացնում Իրանի անվտանգությանը։

Վելայաթին այս հայտարարությունն արել է երկուշաբթի օրը Թեհրանում Հայաստանի դեսպան Գրիգոր Հակոբյանի հետ հանդիպման ժամանակ։

«Թրամփի այսպես կոչված կովկասյան ծրագիրը ոչնչով չի տարբերվում «Զանգեզուրի միջանցքից», և Իսլամական Հանրապետությունը կտրականապես դեմ է դրան»,-«Մեհեր»-ի փոխանցմամբ ասել է նա։

Վելայաթին բացատրել է, որ միջանցքը ստեղծում է «պայմաններ Իրանից հյուսիս ՆԱՏՕ-ի ներկայության համար» և լուրջ անվտանգության սպառնալիք է ներկայացնում Իրանի հյուսիսային և Ռուսաստանի հարավային մասերի համար։

Իսլամական հեղափոխության առաջնորդի ավագ խորհրդականը նաև հայտարարել է, որ այս ծրագիրը «գործնականում նույն նախագիծն է, որի անունը պարզապես փոխվել է, և որն այժմ իրականացվում է Հայաստան ամերիկյան ընկերությունների մուտքի միջոցով»։

Նա նշել է, որ ԱՄՆ-ն ռազմական միջամտություն է կատարում տարածաշրջանում՝ տնտեսական գործունեության պատրվակով։

«Փորձը ցույց է տալիս, որ ամերիկացիները սկզբում զգայուն տարածաշրջաններ թափանցում են թվացյալ տնտեսական նախագծերով, սակայն աստիճանաբար նրանց ներկայությունը ընդլայնվում է մինչև ռազմական և անվտանգությա հետ կապված փոփոխությունների», - ասաց նա՝ հավելելով, որ «Իրանի սահմանների մոտ ցանկացած ձևի ամերիկյան ներկայության բացում ունի ակնհայտ անվտանգության հետևանքներ»։
Աղբյուրը` Panorama.am