Շիրակի թեմի քահանաներին ասել են՝ Փաշինյանի մասնակցությամբ պատարագին պետք է զեղչեն Վեհափառի անունը, քահանաները, սակայն, հրաժարվել են

Այս կիրակի Նիկոլ Փաշինյանը պատարագի կմասնակցի Շիրակի մարզում։ Այս մասին գրում է Aysor.am-ը: Նշել էինք, որ թեմի բոլոր քահանաները հրաժարվել են պատարագ մատուցել, միայն, ըստ լուրերի, Տեր Ռուբենն էր համաձայնել։

Իրավիճակը, սակայն, փոխվել է։ Պատարագը մատուցվելու է Սուրբ Հակոբ Մծբնեցի եկեղեցում, իսկ այդ օրը պատարագ մատուցելու հերթը Տեր Վարուժան ավագա քահանա Տերտերյանինն է։ Aysor.am-ի փոխանցմամբ՝ Տեր Վարուժանը հայտարարել է, որ բացառվում է, որ կզեղչի Ամենայն հայոց կաթողիկոսի անունը։

«Այս կիրակի իմ հերթապահությունն է, պատարագիչը ես եմ, բայց ես մնալու եմ կանոնի մեջ»,- նշեց Տեր Վարուժանը։

Տեր Ռուբենը, ում մոտեցել է «Նոր Հայաստան, նոր հայրապետ» նախաձեռնության ակտիվիստ Կարեն Պետրոսյանն ու ասել, թե ուզում են, որ պատարագը Տեր Ռուբենը մատուցի ու զեղչի Վեհափառի և Սրբազանի անունները։ «Եկան, ինձ խնդրեցին, որ պատարագը ես անեմ, Կարենն էր, ասաց՝ ես պետք է անեմ, երևի այն մտքով, որ ես պետք է զեղչեմ Վեհափառի ու Սրբազանի անունը, բայց ես դրա իրավունքը չունեմ, դա մեր կանոնից դուրս է»,-պատմեց Տեր Ռուբենը։ Հարցին՝ այսինքն ակնարկել են, որ պարտադիր զեղչե՞ք Վեհափառի անունը՝ Տեր Ռուբենն ասաց, թե ասել են, բայց ինքն ասել է՝ իրավունք չունի այդպես անելու։

«Սխալ ինֆորմացիաներ են ուղղակի տարածում, պետք չէ քահանաների անունների հետ խաղալ»,- հավելեց Տեր Ռուբենը։