Մեր մասին զրպարտչական, վիրավորանքի տարրեր պարունակող գրառում կատարած Արուսյակ Ջուլհակյանի հետ կհաղորդակցվեմ դատարանում. Մելոյան

«Երեկ բավականին բուռն լռության օր ենք ունեցել։ Ինչքան գիտեմ, ՀՀ երրորդ հանրապետության պատմության մեջ ԿԸՀ ամենաերկար նիստն ենք ունեցել»,-Panorama.am-ի հարցին ի պատասխան ասաց Վաղարշապատի ՏԻՄ ընտրություններում դիտորդական առաքելություն իրականացնող «Պառլամենտարիզմի զարգացման միջազգային կենտրոն» ՀԿ նախագահ Գոհար Մելոյանը՝ անդրադառնալով «Անկախ դիտորդ» դիտորդական առաքելության կողմից իրենց ու ևս երկու առաքելությունների գանցումն անվավեր ճանաչելու վերաբերյալ դիմումներին ու հարուցված վարույթին։

Մելոյանն ասաց, նիստի պատճառով իրենց աշխատանքները խաթարվել են։

Նա նշեց, որ երեկ իշխանական պատգամավորներից մեկը՝ Արուսյակ Ջուլհակյանն իր ղեկավարած կազմակերպության ու դիտորդական առաքելության վերաբերյալ զրպարտչական ու վիրավորանքի տարրեր պարունակող գրառում էր կատարել։

«Դատական ատյաններում այդ հարցի հետ կապված դատական ատյաններում կհաղորդակցվեմ այդ անձի հետ։ Կոնկրետ իմ ու այլ դիտորդական առաքելության ներկայացուցիչների վերաբերյալ զրպարտչական գրառում էր արել»,-ընդգծեց ՀԿ ղեկավարը։

Նրա խոսքով, ամենամեծ խնդիրն այն է, որ հավատարմագրված վեց դիտորդական առաքելություններից երեքին թիրախավորել էր պատգամավորը ու ներքևում նշել էր մյուս երեքին, որ իրենց վերաբերյալ վերահսկողություն իրականացնեն։

«Ինձ մոտ օբյեկտիվ հարց է առաջանում։ Արդյոք իշխանությունը, որ թեկնածու ունի Վաղարշապատի ընտրություններում, համագործակցո՞ւմ է մյուս երեք դիտորդական առաքելությունների հետ։ Այստեղ ես լուրջ մտահոգություն ունեմ նրանց օբյեկտիվության, անաչառության, անկողմնակալության սկզբունքների պահպանման հետ։ Ես սա հայտնեցի ԿԸՀ երեկվա նիստում, խնդրեցի վարույթի առարկա դարձնեն»,-ասաց Մելոյանը։

Պառլամենտարիզմի զարգացման միջազգային կենտրոնը ձեւավորվել է 2019 թվականին՝ իր գործունեության առաջնային նպատակ հռչակելով ժողովրդավարության հաստատումը, իրավունքի գերակայության ամրագրումը, պառլամենտարիզմի զարգացումը, մարդկանց իրազեկվածության ու իրավագիտակցության բարձրացումը, մարդու անձնական, քաղաքական, սոցիատնտեսական իրավունքների իրականացման երաշխավորումը Հայաստանի Հանրապետությունում։

Իր գործունեության 6 տարիների ընթացքում կազմակերպություն իրականացրել է իրազեկող գործունեություն, կազմակերպել է դասընթացներ մարզերում։ ՊԶՄԿ-ն նաեւ իրականացնում է դիտորդական առաքելություն ընտրական գործընթացներում, որի համատեքստում կազմակերպում է դասընթացներ եւ վերապատրաստում դիտորդների։

Մանրամասները՝ տեսանյութում։