Ալիևը սպառնում է Հայաստանին, որ եթե Փաշինյանը չընտրվի, ապա կլինի նոր պատերազմ
Ալիևը վերջին հարցազրույցում, գրեթե բաց հայտարարեց հետևյալը.
«... եթե Փաշինյանը պարտվի ընտրություններում, ապա, դա կարող է լինել ուժեղ արտաքին միջամտության արդյունքում, և մենք կարող ենք մտածել, որ դա կարող է խաթարել նախկինում համաձայնեցված հարցերը: Բայց դա շատ վնասակար կլինի հենց Հայաստանի համար...»:
Ադրբեջանի ղեկավարը նշեց, նաև, որ եթե Հայաստանում «ինչ-որ բան պատահի» և իշխանությունները նահանջեն ԱՄՆ նախագահ Դոնալդ Թրամփի միջնորդությամբ Վաշինգտոնում ստորագրված համաձայնագրից, դա կվատթարացնի Երևանի հարաբերությունները և՛ Բաքվի, և՛ Վաշինգտոնի հետ։ Ալիևը նաև ընդգծեց, որ Վաշինգտոնում ստորագրված համաձայնագրի խախտումը կնշանակի ամբողջ աշխարհի դեմ դուրս գալ:
Վերջում, սպառնալով Հայաստանին, որ «...Եթե Հայաստանը դադարի ճանաչել մեր տարածքային ամբողջականությունը, մենք նույնը կանենք նրանց տարածքային ամբողջականության հետ...»։
Ալիևը սույն տեսակետը հավելեց նաև այն համոզմունքով, որ դրա արդյունքում ավելի շատ կտուժի Հայաստանը:
Այն, որ Ալիևը մինչ հայաստանյան ընտրությունները պիտի իր աջակցությունը ցույց տար Փաշինյանին, մենք վաղուց էինք կանխատեսել:
Այն, որ Փաշինյանին մինչ ընտրությունները մի ինչ որ «թուղթ էր» անհրաժեշտ, որ նա կարողանար թափահարել հայ հանրության առջև, թե իբր «խաղաղություն է բերում Հայաստանին», նույնպես կանխատեսում էինք, որն այսօր իրականություն է դառնում:
Ավելին, Ալիևը Փաշինյանին «նվիրեց» լրիվ դատարկ «թուղթ», առանց խոստումների և երաշխիքների, և նույնիսկ՝ պայմանագիր, հավանաբար համոզված լինելով, որ իր այդ «նվերը» բավարար կլինի Փաշինյանին՝ ընտրություններում հանրությանը խաբելու համար:
Այս ամենը ցույց է տալիս, որ գալիք ընտրություններում, Փաշինյանը հանդես է գալու մեծ արտաքին կոալիցիայով. Ադրբեջանի գլխավորությամբ և, որի գլխավոր կարգախոսը պիտի լինի՝ հայ հանրությանը վախեցնել պատերազմով, եթե վերջինս մերժի Փաշինյանի իշխանությանը:
Իսկ ինչ պիտի անի ընդդիմությունը, դա արդեն առանձին խոսակցության թեմա է:
Խաղասեղանին դրված է երկրի լինել-չլինելու հարցը, և այստեղ պիտի մոտենալ ոչ թե այնպես, թե քանի տեղ պիտի փախցնի ԱԺ-ում այս կամ այն քաղաքական ուժը, այլ՝ ինչպես հանդես գալ, որ և՛ Փաշինյանի իշխանության վերարտադրությունը կանգնեցնել, և՛ թույլ չտալ, որ Ալիևը կարողանա իրականացնել իր սպառնալիքը Հայաստանի հանդեպ:
Սա է իրականությունը:
Դավիթ Մկրտչյան
Zham.am
Հետևեք մեզ Facebook-ում