Սիրիայում թեժ մարտեր են ընթանում իշխանամետ խմբերի և դրուզների միջև. գյուղեր են այրվում (տեսանյութ)

Սիրիայի հարավում գտնվող Սուվեյդա նահանգում թեժ մարտեր են ընթանում իշխանամետ զինված կազմավորումների և դրուզական ջոկատների միջև: Տեղեկությունը հայտնում են մերձավորարևելյան թեմաներ լուսաբանող տելեգրամյան ալիքները։

Սիրիայի կառավարության կողմից աջակցվող ցեղային կազմավորումները փորձում են հարձակվել Սուվեյդա քաղաքի վրա։ Բեդվինների և դրուզների միջև մարտերն այժմ ընթանում են Սուվեյդայի մոտակայքում։

Դեռ երեկ տեղեկություն կար, որ կողմերի միջև կրակի դադարեցման պայմանավորվածություն է ձեռք բերվել։ Թուրքական ԶԼՄ-ները, հղում անելով անվտանգության մարմինների աղբյուրին, հայտնել էին, թե Անկարան կարևոր դեր է խաղացել Սիրիայի Սուվեյդա նահանգում հրադադար հաստատելու գործում:

Սակայն անցած գիշեր հարյուրավոր բեդվիններ շարժվել են դեպի Սուվեյդա նահանգ։ Սիրիայի իշխանությունները ևս լրացուցիչ ուժեր են ուղարկել երկրի հարավ։ Զինված կազմավորումների տեղափոխումը շարունակվում է։

Բեդվիններն այրում են դրուզների դրոշները, գյուղերը, զինված կազմավորումները շարունակում են հրաձգությունը և հարձակումները։ Դրուզների շրջանում բազմաթիվ զոհեր և վիրավորներ կան։ Գերեվարվել են կանայք ու երեխաներ։ Կորուստներ ունեն նաև զինյալները։