ՔՊ-ի հերթական մանիպուլյացիան՝ «Իմ Գյումրի» ծրագրով՝ Գյումրիում 5 շենքերի կառուցումը վերագրում են իրենց

«168.am»-ը գրում է. «Մարտի 30-ին Գյումրիում սպասվում են արտահերթ ընտրություններ. գյումրեցիները կընտրեն իրենց նոր համայնքապետին։

Արտահերթ ընտրություններին մասնակցելու են հետևյալ 9 դաշինքներն ու կուսակցությունները՝ «Հայաստանի կոմունիստական կուսակցություն», «Իմ հզոր համայնք», «Հայաստանի աշխատավորական սոցիալիստական կուսակցություն», «Ապրելու երկիր» կուսակցություն, «Մեր քաղաքը» դաշինք, կազմում՝ «Միացյալ Հայաստան» և «Հայրենիք» կուսակցությունները, «Դեմոկրատական այլընտրանք» կուսակցություն, «Քաղաքացիական պայմանագիր» կուսակցություն, «Մայր Հայաստան» կուսակցությունների դաշինք, կազմում՝  «Ինտելեկտուալ Հայաստան», «Իմ պայքար, իմ հայրենիք» կուսակցությունները, «Եվրադաշինք», կազմում՝ «Հայաստանի եվրոպական կուսակցություն», «Հանրապետություն», «Հանուն Հանրապետության ժողովրդավարության պաշտպանների դաշինք» կուսակցությունները։

Գյումրիում այս պահին համայնքապետի ժամանակավոր պաշտոնակատար է «Քաղաքացիական պայմանագիր» կուսակցության անդամ Սարիկ Մինասյանը։ Նա այդ պաշտոնին նշանակվեց նախորդ տարվա դեկտեմբերին, երբ Նիկոլ Փաշինյանը Գյումրիում անցկացրեց փրայմըրիզ։

Սարիկ Մինասյանը մինչ այդ եղել էր կուսակցական, 2018 թվականի հայտնի դեպքերից հետո իրեն հռչակել էր անկուսակցական, իսկ փրայմըրիզից անմիջապես հետո դարձավ ՔՊ կուսակցության անդամ։

Ամբողջ ՔՊ-ն այս պահին լծված է Սարիկ Մինասյանին ամեն կերպ Գյումրու համայնքապետ դարձնելու գործին, տեղում ակտիվ աշխատում են Գյումրու ՔՊ-ական մարզպետը, պատգամավորները, նախարարները։

Մարտի 15-ին մեկնարկած նախընտրական քարոզարշավից մեկ օր առաջ՝ մարտի 14-ին, Սարիկ Միասյանը մասնակցել էր մանկապարտեզի բացմանը, հանդիպել Արցախից բռնի տեղահանված մի քանի ընտանիքների հետ, հետո հայտարարել, թե «հատիկ առ հատիկ» բոլոր փողոցները կասֆալտապատվեն, կզբաղվի նաև փողոցային շների հարցով, այդպիսով՝ նախապատրաստվելով քարոզարշավին։

Այս պահին ՔՊ-ականներն առիթը բաց չեն թողնում իրենց վերագրել նախկինում Գյումրիում կառուցված շենքերի, մանկապարտեզների, դպրոցների և այլ շինությունների աշխատանքները, քարոզարշավը մի քիչ երկարելու դեպքում չէր բացառվում, որ ՔՊ-ականները հայտարարեին, թե Գյումրին իրենք են հիմնադրել։

Երեկ Հանրայինի եթերում, բացի Վարդան Ղուկասյանից, մյուս դաշինքների ու կուսակցությունների թեկնածուները մասնակցեցին մեծ բանավեճին, որտեղ Սարիկ Մինասյանը հայտարարեց, թե Գյումրիում 7 տարիների ընթացքում 5 շենք են կառուցել, մինչդեռ այդպես չէ։

Իրականությունն այն է, որ 2014 թվականից գործող «Իմ Գյումրի» ծրագրի շնորհիվ են այդ շենքերը կառուցվել, պարզապես շենքերի բացման ժապավենը կտրել է ՀՀ նախագահ Վահագն Խաչատուրյանը, ինչից հետո ՔՊ-ն քարոզում է, թե Գյումրիում «հսկայածավալ» աշխատանք է արել։

Նշենք, որ այդ ծրագիրը ստեղծվել է ամերիկյան հիմնադրամի հետ միասին՝ Ռոբերտ Օղլախչյանի գործուն աջակցությամբ։

Նախորդ տարի Գյումրիում նորակառույց հերթական շենքի բացման ժամանակ այդ մասին մանրամասն ներկայացրել է Ռոբերտ Օղլախչյանը՝ հայտարարելով, որ 70 տարեկան է և պետք է ապրի այնքան՝ մինչև տեսնի առանց տնակ Գյումրի»։