Եթե պետք լինի, կարող եմ տասնյակ կետեր ասել, երբ Ադրբեջանն է ոտնահարել մարդու իրավունքները և պատճառվել են նյութական վնասներ. Միրզոյանը՝ Հաջիևին

Ես կփորձեմ մեղմ ձևակերպել՝ իսկապես այն դեպքերից է, որ ոչ կառուցողական մոտեցումներով ուղղակի տորպեդահարում են բանակցային գործընթացը, խաղաղ կարգավորումը և հարաբերությունների հաստատումը: Այս մասին ԱԺ-ում լրագրողների հետ զրույցում ասաց ՀՀ ԱԳ նախարար Արարատ Միրզոյանը՝ պատասխանելով հարցին՝ Ադրբեջանի նախագահի խորհրդական Հիքմեթ Հաջիևը հայտարարել է, որ Հայաստանը պետք է «օկուպացված տարածքների» համար փոխհատուցում տա, այս հայտարարությունները տրամաբանակա՞ն են, եթե նշվում է՝ արդեն իսկ խաղաղության համաձայնագիրը համաձայնեցված է:

«Միանշանակ չենք կիսում այս մոտեցումը և եթե պետք լինի, ես կարող եմ տասնյակ կետեր ասել, որտեղ իրենց կողմից ոտնահարվել են թե՛ մարդու իրավունքները, թե՛ նյութական վնաս են պատճառվել: Բայց այն դրույթը, որի մասին վերջերս այդքան խոսում էինք՝ այդ երկու հոդվածների մասին, որոնցից մեկը իրավական հայցերի հետ վերցումն է, այն պահից երբ ուժի մեջ կմտնի խաղաղության համաձայնագիրը, կողմերը հետ կվերցնեն հայցերը, միևնույն ժամանակ պարտավորություն են ստանձնում երկու կողմն էլ ապագայում ևս հանդես չգալ իրար նկատմամբ հայցերով այն խնդիրների շուրջ, որոնք գոյություն են ունեցել կողմերի միջև մինչև պայմանագրի ստորագրումը:

Այսինքն բոլոր այն վեճերը, որ մենք հիմա ունենք ենթադրում է բոլոր այդ վեճերով պետք է գնանք հաշտեցման»,- ասաց նա: