Լարված իրավիճակ է Հաղթանակ թաղամասում. «Մեր խնդիրներն այս իշխանության օրոք ավելացել են, դարձել անլուծելի»

Լարված իրավիճակ է Երևանի Հաղթանակ թաղամասում. քաղաքացիները փակել են ճանապարհը, պահանջում են իրենց խնդիրների լուծում: Տարածքում մեծ թվով ոստիկաններ են ։ 

Բնակիչները նշեցին, որ արդեն մի քանի տարի է չեն կարողանում իրենց սեփական հողերի հետ կապված գործարքներ անել, մասնավորապես փոխել գյուղնշանակության հողերի կարգավիճակը։  Բնակիչների ներկայացմամբ,  տասը պահանջ ունեն, քաղաքապետարանի հետ պայմանավորվածություն էին ձեռք բերել, երեք կետին պետք է լուծում տրվեր, սակայն որևէ քայլ չի կատարվել։ 

Բնակիչներից մեկն ասաց, որ իրենց խնդիրներն այս իշխանության օրոք ավելացել են, դարձել անլուծելի. «Գերեզմանատան հետ կապված խնդիր ունենք։ Կառավարությունն ինչ-որ  միջազգային նորմով հաստատել է, որ յուրաքանչյուր գերեզմանատուն, որը չունի պարսպապատ հատված, 300  մետր շառավղով արդեն սանիտարական գոտի է, իսկ դրա հարակից հատվածներում բնակիչներն իրենց հողատարածքները չեն կարող շահագործել, օրինակ, փոխել հողի նշանակությունը, վաճառել կամ այլ գործարք իրականացնել, քանի որ այդ հողը գտնվում է   սանիտարական գոտում»։

Նա նշեց, որ պահանջում են Աժ-ից, կառավարությունից, քաղաքապետարանից,  Կադաստրի կոմիտեից մեկական ներկայացուցիչ հանդիպել իրենց լիազոր ներկայացուցչի հետ, լուծում տալ խնդիրներին։

«Մենք ունենք լուծումների մեր տարբերակը»,- նշեց Հաղթանակ թաղամասի բնակիչը։ 

Մեկ այլ բնակիչ նշեց. «Սեփականության ակտերը, որոնք նախկինում ժողովուրդն ունեցել է որպես փաստաթուղթ սեփականության համար, պետք է փոխակերպվեն նոր նմուշի վկայականով,  որը քաղաքապետարանի գործառույթներից է։ Քաղաքապետարանն այսօր շատ հատված սարքել է պրոբլեմատիկ, ասում է՝ պրոբլեմ ունի ու չի մտնում այդ պրոբլեմի տակ։ 

Այսինքն, չենք կարողանում ձեռք բերել սեփականության վկայականներ և բնակիչները չեն կարողանում իրացնել իրենց սեփականության իրավունքը: Այսինքն, միայն կարողանում ենք մշակել, իսկ վաճառել, օտարել, նվիրատվություն անել չի լինում, պետք է նոր նմուշի վկայական: Պետք է քաղաքապետարանն այդ հատվածում սահմանների ճշտման գործողություն անի, սկսում է խնդիրներ առաջ քաշել, որ մարդկանց սեփականության թղթերի մեջ կան ջնջումներ, անճշտություններ, որոնք քաղաքացու խնդիրը չէ»:
Աղբյուր՝  Panorama.am

Տեսանյութը՝ News.am-ի