Ալիևը ծանր վիճակում է՝ Սյունիքի գրավումը գոյության խնդիր է նրա համար, վտանգը շատ մեծ է. Ստեփան Դանիելյան (տեսանյութ)

Կարծում եմ, շատ բան է փոխվել աշխարհում, եւ այն հին աշխարհը, որը կար, որը մենք գիտեինք, այլեւս գոյություն չունի։ Այս մասին NEWS.am-ի հետ զրույցում հայտնել է քաղաքագետ, «Մայր Հայաստան» շարժման նախաձեռնող խմբի անդամ Ստեփան Դանիելյանը՝ մեկնաբանելով Ադրբեջանի նախագահ Իլհամ Ալիեւի կողմից Հայաստանի հասցեին հնչեցրած վերջին սպառնալիքները։

Նրա խոսքով՝ երբ Ադրբեջանի նախագահն ասում է, որ քաղաքական իրավիճակ է փոխվել, աշխարհաքաղաքական փոփոխություններ են տեղի ունեցել, հին աշխարհակարգ այլեւս գոյություն չունի, Հայաստանում շատ վատ են հասկանում դրա իմաստը։

«Տեսեք, Ուկրաինայում կոնֆլիկտ կա, որտեղ Ռուսաստանը հայտարարել է, որ Ղրիմը եւ ուկրաինական տարածքների մի մասը համարվում են Ռուսաստանի տարածք։

Միացյալ Նահանգների նախագահը տարածքային պահանջներ էր դրել Դանիայի նկատմամբ։ Գրենլանդիան, ասում է, դա մեզ պետք է։ Ինքը Կանադան հայտարարում է հիսունմեկերորդ նահանգ, ինքը Պանաման վերադարձնելու կամ վերահսկողության տակ վերադարձնելու հայտարարություններ է անում։ Իսրայելը մտնում է, Սիրիայից տարածքներ է վերցնում, Թուրքիան մտել է Սիրիա եւ հիմա արդեն ռազմական գործողություններ կարող է նորից սկսել։ Մենք տեսնում ենք, որ աշխարհն արդեն փոխվել է։ Այսինքն աշխարհը, որը ձեւավորվել էր 1945 թվականից հետո երկու հիմնական սկզբունքների վրա՝ տարածքների անձեռնամխելիությունը եւ մարդու իրավունքները, դա այլեւս գոյություն չունի։ Այ դրա մասին էր խոսում Ադրբեջանի նախագահը»,-պարզաբանեց Ստեփան Դանիելյանը։

Նա շեշտեց, որ պատահական չէ, որ Ադրբեջանի նախագահը հենց այս պահին է նման հայտարարությամբ հանդես գալիս։

«Այսինքն աշխարհը փոխվել է, հիմա նոր մի բան է կատարվում։ Եւ երբ Ռուսաստանի նախագահը խոսում է բազմաբեւեռ աշխարհի մասին, դա ի՞նչ է նշանակում։ Դա նշանակում է՝ մի քանի գլխավոր խաղացողներ են լինելու։ Այսինքն վերադառնում ենք կայսրություններին, եւ մանր երկրներն արդեն կա՛մ վերանալու են, կա՛մ նոր երկրներ են հայտնվելու, կա՛մ պետք է իրենք մտնեն, դառնան կլիենտ որեւէ մեծ երկրի։ Այսինքն աշխարհը փոփոխվում է։ Նոր կարգ դեռեւս չի ձեւավորվել։ Եւ այս պահին, այո՛, Ադրբեջանը նման հայտարարություններ է անում, եւ ասում է՝ Հայաստանում դա չեն հասկանում։ Մի քանի անգամ նա դա ասել է, որ աշխարհը փոխվել է, դուք չեք հասկանում։ Եւ այդ պայմաններում Հայաստանի վարչապետ կոչվածը ելույթ է ունենում, ասում է՝ կա միջազգային հանրություն, կա միջազգային կարգ, մենք խաղաղությամբ ենք շարժվելու եւ աշխարհը թույլ չի տալու, որպեսզի Ադրբեջանը հարձակվի Հայաստանի վրա։ Մենք այլ տարբերակ չունենք։ Այս մարդը իրականությունից դուրս է գտնվում, չի հասկանում՝ ինչ է կատարվում։ Ու այս իրավիճակում դու պետք է կողմնորոշումներ ունենաս աշխարհաքաղաքական եւ մտնես ինչ-որ թիմերի մեջ։ Կարո՞ղ ես մտնել, թե՞ չես կարող մտնել։ Ադրբեջանը մի քանի ուղղություններով խաղում է։ Ե՜ւ Ռուսաստանի հետ խորքային պայմանավորվածություններ ունի, ե՜ւ Թոիրքիայի հետ, ե՜ւ հիմա հայտարարում է, որ Միացյալ Նահանգների ստրատեգիական դաշնակիցն է աշխատում դառնալ»,-ասաց Ստեփան Դանիելյանը։