Ասեք՝ կանե՞նք, թե կուզենք՝ կանենք, կուզենք՝ չէ. քաղաքապետարանը միայն օրենքներ է խախտում

«Հետքը» գրում է. «Ուղեվարձը 100-դրամանոցով վճարելու վերաբերյալ իրավական ակտ կա՞, թե՞ ոչ. հարցին պատասխանելու համար Երևանի քաղաքապետարանին 30 օր է անհրաժեշտ հոդվածը հրապարակելով՝ ակնկալում էինք, որ գոնե օրենքով սահմանված 30-օրյա ժամկետը քաղաքապետարանի պաշտոնյաներին բավարար կլինի «որոշում կա՞, թե ոչ» հարցի պատասխանը գտնելու համար։ Պարզվեց` լավատես էինք։

Քաղաքապետարանին հարցումն ուղարկվել էր նոյեմբերի 7-ին, նոյեմբերի 12-ին քաղաքապետարանից տեղեկացրել էին, թե «հարցմանը պատասխանելու համար անհրաժեշտ է կատարել լրացուցիչ աշխատանք: «Տեղեկատվության ազատության մասին» ՀՀ օրենքի 9-րդ հոդվածի 7-րդ մասի 3-րդ կետի դրույթների համաձայն՝ հարցման պատասխանը կտրամադրվի 30-օրյա ժամկետում»: Դեկտեմբերի 7-ին օրենքով սահմանված 30-օրյա ժամկետը լրացավ, բայց պատասխան չկա ու չկա։

Հիշեցնենք, որ նոյեմբերի 7-ին Երևանի քաղաքապետարան հարցում ուղարկելով՝ փորձում էինք  պարզել՝ կա՞, արդյոք, որևէ իրավական ակտ, որի համաձայն՝ 100 դրամանոցով կամ QR կոդով վճարումը դարձել է պարտադիր: Քաղաքապետարանի պատասխանատուներին խնդրել էինք առկայության դեպքում տրամադրել այն, իսկ բացակայության պարագայում պարզաբանել, թե ինչ հիմքով են պարտադիր պահանջի մասին խոսում, ու ինչու են ավտոբուսների վարորդները ոչ 100 դրամանոց մետաղադրամով ուղեվարձը վճարող ուղևորներին պահանջում իջնել ավտոբուսից:

Քաղաքապետարանում գերադասում են օրենք խախտել ու այդպես էլ մեր հարցմանը չպատասխանե՞լ, չխոստովանե՞լ, որ առանց իրավական հիմքի քաղաքացիներին պահանջներ են ներկայացրել, թե՞ գաղտնի և մինչ այժմ չհրապարակված որոշում կա ու ինչ-որ չինովնիկ թերանում է աշխատանքում, օրենքով սահմանված ժամկետում իրավական այդ ակտը մեր հարցմանն ի պատասխան չի տրամադրում՝ դժվար է ասել։ Բայց միանշանակ կարելի է պնդել, որ 5 օր է` քաղաքապետարանում օրենք են խախտում սահմանված ժամկետում հարցմանը չպատասխանելով, ու որևէ մեկը դրա համար պատասխանատվություն չի կրում։

Մնում է քաղաքացիներին խորհուրդ տալ ուղեվարձը վճարելիս բացառապես 100 դրամանոցով վճարելու պահանջ ներկայացնողներին հարցնել, թե ի՞նչ իրավական ակտով է նման բան սահմանված, պատասխան չստանալու դեպքում էլ հիշեցնել Սահմանադրության 39-րդ հոդվածը, որտեղ նշված է․ «Ոչ ոք չի կարող կրել պարտականություններ, որոնք սահմանված չեն օրենքներով»»: