Արևմուտքը ստիպված ճանաչեց Վրաստանի ընտրությունները իրավական մասով, սակայն կշարունակի քաղաքական պայքարն՝ ընդդեմ իշխանության

Անցած ընտրություններում «Վրացական երազանքը» մաքուր հաղթանակ տարավ՝ հավաքելով ձայների ավելի քան 53 %:

Մնացած ընդդիմադիր ուժերի հավաքած ձայները հերիք չեն լինի՝ իշխանությունը հեռացնելու համար:

Ընդ որում, Իվանիշվիլու թիմակիցներին հաջողվեց հաղթանակ տանել այն պարագայում, երբ արևմտյան գրեթե բոլոր կառույցները բացահայտորեն գործում էին «Վրացական երազանքի» դեմ:

Ընտրությունների ժամանակ, թեև արձանագրվել էր ավելի քան 300 խախտում, սակայն երկրի  ոչ մի շրջանից, հանձնաժողովների արձանագրություններում, կարելի է ասել, որ գրեթե ոչ մի լուրջ խախտում չի արձանագրվել:

Այսինքն, եթե ընդդիմությունը հայտարարում է, որ չի ճանաչում ընտրությունների արդյունքները, ապա պիտի կարողանա համոզիչ հիմնավորմամբ բողոքի փաթեթ ներկայացնել երկրի Սահմանադրական դատարան, իսկ այդպիսի հիմնավորումներ գրեթե չկան:

Ավելին, ընտրությունների լիգիտիմությունը ստիպված արձանագրեցին նույնիսկ պաշտոնական արևմտյան կազմակերպությունները, որոնք հետևում էին ընտրությունների գործընթացին:

Ներկայացնենք Եվրոպայում անվտանգության և համագործակցության կազմակերպության Ժողովրդավարական հաստատությունների և մարդու իրավունքների գրասենյակի (ԵԱՀԿ/ԺՀՄԻԳ) դիտորդական առաքելության ներկայացուցչի  հայտարարությունը.

Առաջին՝

ԵԱՀԿ առաքելության համակարգող Պասկալ Ալիզարը հատուկ ճեպազրույցում նշեց ընտրությունների կազմակերպման լավ մակարդակը։

Երկրորդ՝

Ընտրությունների օրն ընդհանուր առմամբ լավ էր  կազմակերպված , և ընտրողները լայն ընտրության հնարավորություն ունեին՝ պայմանավորված քաղաքական ձայների բազմազանությամբ:

Երրորդ՝

իրավիճակը լարված էր, հաճախ խախտվում էր քվեարկության գաղտնիությունը, կային ընթացակարգային անհամապատասխանություններ ու խախտումներ

Չորրորդ՝

Ընտրությունների ընթացքում  արձանագրվել են ահաբեկումներ և ճնշումներ

Հինգերորդ՝

Կար քաղաքական ուժերի միջև ֆինանսական ռեսուրսների անհավասարակշռություն

Վեցերորդ՝

Վրաստանի ընտրությունները  անցան քաղաքական  խոր բևեռացումով, վերջերս ընդունված օրենքների վերաբերյալ մտահոգություններով:

Այսպիսով, եթե ամփոփենք այս գնահատականները, ապա կարող ենք նշել, որ ընտրությունները վերահսկող այս գլխավոր մարմինը փաստացի հաստատեց ընտրությունների լիգետիմությունը:

Իհարկե կային նաև բազմաթիվ բացասական երևույթներ: Ով չգիտի, որ ընտրությունները անցկացվեցին ծայր աստիճան բևեռացման պայմաններում: Բայց դրա մեղավորը միայն իշխանությունները չէին: Դրա պատճառը ավելի շատ հենց արևմտյան կառույցներն էին, որոնք վրաց հանրությանը  կեղծ նարատիվներ էին ներկայացնում, թե իբր «այդ ընտրությունը Արևմուտքի և Ռուսաստանի միջև է»:

Արևմտյան կառույցները, գրեթե բոլշևիկյան մեթոդով, փորձում էին այն կարծր դիրքորոշումով հանդես գալ, թե՝  կա՛մ ընդդիմությունը պետք է վերադառնա իշխանության, կա՛մ Վրաստանը կկործանվի: «Մահ կամ ազատություն» հիշեցնող այս բոլշևիկյան ոճը հենց արևմտյան կառույցները թելադրեցին և ստացան պատասխան՝ հանրության կողմից:

Եվ այդ իմաստով մեղադրել, որ ընտրությունները ընթացան ծայրաստիճան բևեռացման պայմաններում, պարզապես փարիսեություն է:

Նույնիսկ այսօր, երբ արդեն բոլորին է հայտնի, որ ընտրությունները կայացել են առանց մեծ խախտումների, ԱՄՆ պետքարտուղար Էնթոնի Բլինքենը փորձում է շիկացմանը նպաստող հայտարարություններով ապակայունացնել քաղաքական իրավիճակը Վրաստանում:

Այն պարագայում, երբ վրացական ընդդիմությունը հայտարարում է, որ չի ճանաչում ընտրության արդյունքները, չունենալով իրավական հիմնավորումներ, Բլինքենի պահվածքը կարելի գնահատել որպես սադրիչ:

Սակայն պետք չէ զարմանալ, քանի որ այդ բլինքենները նույն ԱՄՆ-ի ընտրությունների շեմին նույն սադրիչ հայտարարություններով են հանդես գալիս Թրամփի հանդեպ, հայտարարելով, օրինակ, որ իրեն պիտի ձերբակալել:

Այսքանից հետո հավատալ ամերիկյան, կամ արևմտյան դեմոկրատիայի չափանիշներին շատ դժվար կլինի:

Պարզապես զարմանալ կարելի է, թե ինչ աստիճանի դեգրադացվեցին արևմտյան դեմոկրատիայի չափանիշները, որը մեծ աղետի է հանգեցնում աշխարհի ժողովուրդներին:

Սա է իրականությունը:

Դավիթ Մկրտչյան
Zham.am