«Էդ երբվանի՞ց միջպետական ճանապարհը թշնամուն հանձնելը դարձավ շինաշխատանք»․ Վահե Սարգսյան

Պատմաբան, խմբագիր Վահե Սարգսյանի ֆեյսբուքյան գրառումը․

«Էդ երբվանի՞ց միջպետական ճանապարհը թշնամուն հանձնելը դարձավ շինաշխատանք։ Ճանապարհային դեպարտամենտից հայտնում են.

«Շինարարական աշխատանքներով պայմանավորված՝ հուլիսի 10-ից երթևեկության համար ժամանակավորապես կփակվի Հ-58 հանրապետական նշանակության ճանապարհի Կիրանց գյուղով անցնող հատվածը։ Տվյալ հատվածը վարորդները կարող են շրջանցել Հ-58-Աճարկուտ-Հ-58 ավտոճանապարհով»։ ՆՈՒՅՆ ՍՑԵՆԱՐԸ, ինչը եղավ Սյունիքում՝ Գորիս-Կապան ճանապարհի դեպքում: Քայլ 1. Կիրանց են գնում հայտնի գաիշնիկ, սեփական տունը թշնամուն հանձնելու գործում լայն աջակցություն ցուցաբերած գորիսեցի մերօրյա Մելիք Ֆրանգյուլ Արմեն Խաչատրյանն ու ադրբեջանաթուրքական ազդեցության մի քանի մանր այլ սուբյեկտներ՝ անուղղակի հայտարարելով, որ ամեն ինչ հրաշալի է, «իրենք հենց հիմա այնտեղ են, և ոչ մի ադրբեջանցի չեն տեսնում» կամ «Հադրութը մեր ձեռքում է, իսկ Շուշիի համար մարտերը դեռ շարունակվում են»:

Քայլ 2. Փաշինյանի չարիքի իշխանությանը ծառայող պետական օղակները սկսում են միջպետական ճանապարհը թշնամուն հանձնելու գործը «մուղամով սղղցնել» հասարակության շրջանում՝ տպավորություն ստեղծելով, թե իբր «ժողովրդի նվիրյալ իշխանությունը» զօրուգիշեր ասֆալտապատում է ճանապարհները, դրա համար էլ «ժամանակավորապես» այդ հատվածները փակ կլինեն:

Ամենավերջին դավաճանն անգամ մի փոքր ամոթ կունենար, բայց ՀՀ-ի պարագայում տեղի ունեցող՝ նախադեպը չունեցող հրեշավոր ծրագիրը բոլորովին այլ կանոններ ունի: Մինչև ե՞րբ է հայ ժողովուրդն այսպես անամոթաբար խաբվելու և ստորացվելու: Ամենևին պատահական չէ, որ Բագրատ Սրբազանը պատերազմ է հայտարարել հենց այս ստորացուցիչ, նվաստացուցիչ ու կործանարար ստին ու կեղծիքին, այս ստրկացուցիչ ընթացքին»: