Ծանր ապրումներով համակվեցին մեր հոգիները, երբ միաբանակից եղբորս՝ Հոգեշնորհ Տ. Սահակ վարդապետ Շաքարյանի հետ այցելեցինք Վարդենիս համայնքի Ծովակ գյուղի նահատակ հայորդյաց ընտանիքներին

Հայոց Հայրապետի օրհնությամբ Մայր Աթոռիս զինվորյալ միաբաններն այսօր Սուրբ Էջմիածնի առաքելությունը՝ որպես օրհնություն, մխիթարություն և առավել կյանքի պատգամ բաշխեցին Գեղարքունյաց տիրախնամ թեմի սահմանամերձ շեների ընտանիքներին: Այն ընտանիքներին, որոնք իրենց զավակներին, եղբայրներին ու հայրերին դրեցին Հայրենիքի զոհասեղանին:

Մինչև ե՞րբ, Տեր Աստված, Հայոց աշխարհում պետք է հեղվի ազնիվ հայի արյունը...

Ծանր ապրումներով համակվեցին մեր հոգիները, երբ միաբանակից եղբորս՝ Հոգեշնորհ Տ. Սահակ վարդապետ Շաքարյանի հետ այցելեցինք Վարդենիս համայնքի Ծովակ գյուղի նահատակ հայորդյաց ընտանիքներին:

Սահմռկեցուցիչ էին պատմությունները, որոնք արդար ընդվզում են առաջ բերում. Հայ զինվորը քաջարի մարտնչել է, սակայն թշնամու դիմաց մնացել է անօգնական...

Արդար Աստված է վրեժի Տերը, և սոսկալի է լինելու բոլոր այն անձանց ճակատագիրը, որոնք Հայրենի երկիրը տարիներ շարունակ հասցրին անկյալ վիճակի և պատերազմի ժամանակ բրուտոսյան հարվածներ հասցրին Հայոց հաղթական բանակին:

Խունկ և աղոթք և օրհնություն մերօրյա նահատակ մարտիկներին:

Կյանք, առավել կյանք նրանց ծնողներին, ամուսիններին, զավակներին:

Հայր Ասողիկ Կարապետյանի ֆեյսբուքյան էջից