Պուտինը ԱՊՀ երկրների անվտանգության խորհուրդներին կոչ է արել գործի դնել անվտանգային բոլոր հզորությունները
ԱՊՀ երկրների անվտանգության խորհուրդներն արդի բարդ եւ անկայուն միջազգային իրադրությունում պետք է մշակեն եւ թարմացնեն ռազմավարական պլանավորման փաստաթղթերը՝ գործի դնելով բոլոր հասանելի հզորությունները։ Այս մասին նշվել է Ռուսաստանի նախագահ Վլադիմիր Պուտինի ողջույնի խոսքում՝ ԱՊՀ երկրների անվտանգության խորհուրդների քարտուղարների՝ հինգշաբթի Մոսկվայում բացված տասներորդ ամենամյա հանդիպման ժամանակ։
Պուտինի ողջույնի ուղերձը, ինչպես տեղեկացրել է «ՌԻԱ Նովոստի»-ն, ընթերցել է ՌԴ ԱԽ քարտուղար Նիկոլայ Պատրուշեւը։
«Այսօր միջազգային իրադրությունը մնում է բարդ եւ անկայուն։ Այս առնչությամբ կարեւոր է լրիվ չափով գործի դնել մեր կառույցների հզոր վերլուծաբանական, կանխատեսման ռեսուրսները՝ ԱՊՀ տարածքում իրավիճակի բազմակողմանի վերլուծության եւ պոտենցիալ մարտահրավերներն ու վտանգները վեր հանելու համար»,- նշվել է ողջույնի խոսքում։
Հենց այս հիմքի վրա պետք է մշակվեն եւ թարմացվեն ռազմավարական պլանավորման փաստաթղթերը, ընդունվեն պատասխանատու պետական որոշումներ։ Նախ եւ առաջ՝ տեղեկատվական եւ կենսաբանական անվտանգության, հակաահաբեկչության, ծայրահեղականությանը, թմրաբիզնեսին, անլեգալ միգրացիային դիմակայելու ոլորտներում, ավելացրել է Պուտինը։
ՌԴ նախագահը վստահություն է հայտնել, որ ներկա հանդիպումը կծառայի ԱՊՀ հավաքական անվտանգության համակարգի ամրապնդմանը, նշանակալի փուլ կդառնա համատեղ արդյունավետ աշխատանքում՝ ի բարօրություն Համագործակցության երկրների եւ ժողովուրդների։