Հրապարակվել է Իսպանիայում ահաբեկչություններից ժամեր առաջ ահաբեկիչների՝ խանութից գնումներ կատարելու տեսանյութը. Տտեսանյութ, լուսանկարներ
Այս ցնցող կադրերը ցույց են տալիս անցած շաբաթ Կատալոնիայում տեղի ունեցած հարձակումների համար պատասխանատու ահաբեկիչներին ահաբեկչությունից ժամեր առաջ խանութի դրամարկղի մոտ ծիծաղելիս և կատակներ անելիս, գրում է The Daily Mail-ը՝ հրապարակելով համապատասխան տեսանյութը։
Կադրերում կարելի է տեսնել, թե ինչպես է նրանցից մեկը, որը չորս ժամ անց սպանվել է ոստիկանի կողմից Կամբրիլս քաղաքում հետիոտների վրա հարձակումից հետո, ծիծաղելով շրջվում մյուսի կողմը՝ քննարկելով, թե ինչ կրակայրիչ են ցանկանում գնել:
Խանութի տեսահսկման համակարգերից ստացված կադրերը հրապարակել է կատալոնական Ara թերթը: Դրանցում երևում են Օմար Հիչամին, Լաս Ռամբլասում մարդկանց ամբոխի մեջ մեքենան ուղղած Յունես Աբույաքուբի եղբայր Հուսեյնը և Մուսա Ուքաբիրը, ով սկզբնապես համարվում էր Բարսելոնայի կենտրոնում ահաբեկչության պատասխանատուն: Կարելի է տեսնել, որ նրանցից մեկը Real Madrid ֆուտբոլային ակումբի վերնաշապիկ է կրում:
Ոստիկանությունը ենթադրում է, որ նրանք ընտրել էին այդ վայրը՝ վերակազմակերպելու համար իրենց պլանները։ Դրանք ձախողվել էին, երբ պայթյուն էր տեղի ունեցել տանը, որտեղ պայթուցիկներ էին պատրաստվում քաղաքի հայտնի հուշարձանների մոտ պայթյուններ կազմակերպելու համար:
Ինչպես ավելի վաղ հայտնել էր Tert.am-ը, Բարսելոնայի ամենահայտնի զբոսաշրջային վայրերից մեկում՝ Լաս Ռամբլաս փողոցում, օգոստոսի 17-ին ֆուրգոնը մխրճվել էր հետիոտների ամբոխի մեջ: Ահաբեկչության պահին հազարավոր մարդիկ զբոսնել են ծառաշատ մայթերով փողոցով, երբ վարձակալված ֆուրգոնը մխրճվել է ամբոխի մեջ: Խուճապահար զբոսաշրջիկները շտապել են պատսպարվել հուշանվերներ վաճառող մոտակա խանութներում, ռեստորաններում ու եկեղեցիներում, մյուսներն էլ չկողմնորոշվելով՝ պարզապես վազել են փողոցով:
Բարսելոնայի կենտրոնում տեղի ունեցած ահաբեկչությունից հետո տեղի է ունեցել նաև երկրորդ ահաբեկչական հարձակումը 120 կիլոմետր հեռավորությամբ գտնվող Կամբրիլս քաղաքում: Մեքենան վրաերթի է ենթարկել մարդկանց, հաղորդվել էր 1 զոհի մասին։ Ոստիկանները սպանել են հինգ հարձակվողներին, որոնցից մի քանիսը կեղծ պայթուցիկ գոտիներ են կրել:
Բացի այդ, նույն օրը՝ օգոստոսի 17-ին, կատալոնական Ալկանար քաղաքում պայթյուն է որոտացել, որի հետևանքով մեկ մարդ է զոհվել և առնվազն մեկ մարդ վիրավորվել: Ոստիկանությունը ենթադրում է, որ տարածքում պայթուցիկներ էին պատրաստվում:
Վերջին տվյալներով՝ ահաբեկչությունները 15 մարդու կյանք են խլել և վնասվածքներ են հասցրել 100-ից ավելի մարդու:
Աղբյուրը` Tert.am