Սաուդյան Արաբիայի թագաժառանգը հրաժարվել է ԱՄՆ նախագահ Բայդենի հետ հեռախոսազրույցից. The Wall Street Journal

Երեկ ԱՄՆ նախագահ Ջո Բայդենը հայտարարեց Ռուսաստանից նավթի ու գազի ներկրումն արգելելու մասին։

The Wall Street Journal–ը հայտնում է, որ ԱՄՆ նախագահն այդ թեմայով ցանկացել է քննարկում ունենալ համանման պաշար ունեցող երկրների ղեկավարների հետ։ Սակայն, մերձավորարևելյան երկու երկրների ղեկավարները (Սաուդյան Արաբիայի արքայազն Մուհամմեդ բին Սալման Ալ Սաուդը և Արաբական Միացյալ Էմիրությունների թագաժառանգ Մուհամմեդ բեն Զայեդ Ալ Նահյանը) հրաժարվել են հեռախոսազրույցներից ԱՄՆ նախագահ Ջո Բայդենի հետ, որը ցանկանում էր քննարկել Ուկրաինայի շուրջ ստեղծված իրավիճակը և նավթի արդյունահանման ավելացման հնարավորությունը՝ համաշխարհային գները նվազեցնելու համար։

Հիշեցնենք, որ այսօր առավոտյան նավթի համաշխարհային գները 2 տոկոսով բարձրացել են՝ Ռուսաստանից մատակարարումների պակասելու պատճառով, վկայում են աճուրդների տվյալները։

Brent տեսակի նավթի մայիսյան ֆյուչերսների գինը բարձրացել է 2,06 տոկոսով՝ մեկ բարելը 130,62 դոլար, WTI-ի ապրիլյան ֆյուչերսներինը՝ 1,63 տոկոսով՝ 125,72 դոլար։

«Հեռախոսազրույցի հետ կապված ակնկալիքներ կային, բայց այն չկայացավ»,- մեջբերում է հրատարակությունը ամերիկացի պաշտոնյայի խոսքերը՝ կապված Սաուդյան Արաբիայի թագաժառանգ արքայազն Մուհամմեդ բին Սալման Ալ Սաուդի հետ Բայդենի բանակցությունների պլանների մասին։ 

Zham.am