Ավտոմատներով մի հատ շոու եղավ, պառկացրեցին գետնին և ձեռնաշղթաներով բերեցին էստեղ․ Սայաթ Շիրինյան. ՏԵՍԱՆՅՈՒԹ, ԹԱՐՄԱՑՎԱԾ
Տեղեկություն ստացանք, որ «Հայաստան» դաշինքի անդամ, ոստիկանության գնդապետ Սայաթ Շիրինյանին բերման են ենթարկել և տարել անհայտ ուղղությամբ։
Տեղեկությունը Yerevan.Today-ը փորձեց ճշտել ոստիկանությունից։
Լրատվական բաժնից ասացին, որ տեղեկություն չունեն և խոստացան կես ժամից ճշտել։ Փորձեցինք կապ հաստատել ԱԱԾ-ի հետ, սակայն ԱԱԾ լրատվական բաժինը զանգերին չի պատասխանում։
Սայաթ Շիրինյանի փաստաբան Բենիկ Գալստյանը մեզ հետ զրույցում նշեց, որ նա ևս որևէ տեղեկություն չունի, թե որ մարմինն է բերման ենթարկել և ինչ պատճառով։ Միայն նշեց, որ հնարավոր է ԱԱԾ են բերման ենթարկել։
Տեղեկություն ստանալուն պես, լրացուցիչ կհայտնենք։
***
Փաստաբան Բենիկ Գալստյանը հայտնում է․ «Իմ ունեցած տեղեկություններով Սայաթ Շիրինյանն այժմ գտնվում է ոստիկանության Մարտունու բաժնում։
Մարտունու ճանապարհին ենք»։
***
Ոստիկանության պահեստազորի գնդապետ, «Հայաստան» դաշինքի անդամ Սայաթ Շիրինյանը բերման է ենթարկվել գողության կասկածանքով։ Այս մասին NEWS.am-ին հայտնեց ՀՀ ոստիկանության ԶԼՄ-ների հետ կապերի բաժնի պետ Զարզանդ Գաբրիելյանը։
«Հարուցված քրեական գործի շրջանակում գողության կասկածանքով բերման է ենթարկվել Ոստիկանության Մարտունու բաժին եւ փոխանցվել նախաքննական մարմնին»,- հայտնեց Գաբրիելյանը։
***
«Հայաստան» դաշինիքի անդամ, ոստիկանության գնդապետ Սայաթ Շիրինյանին տարել են Քննչական կոմիտեի Մարտունու Քննչական բաժին։
Հիշեցնենք, որ դիմակավորված անձանց կողմից իր տան բակից բերման էր ենթարկվել Սայաթ Շիրինյանը։
Իրադարձություններին կարող եք հետևել Yerevan.Today-ի ուղիղ հեռարձակմամբ։
***
Տանից դուրս եկա պատահական մեքենա կանգնեց, ավտոմատներով մի հատ շոու եղավ, պառկացրեցին գետնին և ձեռնաշղթաներով բերեցին էստեղ։ Հիմա ուզում եմ նշել Մարտունու ոստիկանության պետին տգետ, անմակարդակ․․․ նմանատիպ արժեհամակարգով ոստիկանություն մենք չենք թողել, դա Վահե Հակոբյանի դեմքն է։ Այս մասին Yerevan.Today-ի հետ զրույցում ասաց «Հայաստան» դաշինքի անդամ Սայաթ Շիրինյանը։
«Պարզվեց, որ ես իբրև թե կասկածվում եմ գողության մեջ։ Ուղղակի ծիծաղելի է, Վահե Ղազարյանն էնքան տգետ ու անմակարդակա, որ գործ սարքել էլ չգիտի, Շիրինյանն ո՞ւր, Մարտունիում սրճեփ գողանալն ո՞ւր»,- ասաց նա։
Մանրամասները՝ տեսանյութում։