Ժամանցային նշանակության Global Firepower Index վարկանիշի «գաղտնիքը»
Ռազմական թեմաներով հետաքրքրվողները հիմնականում վաղուց տեղյակ են, որ տարբեր կազմակերպությունների կամ անհատների կողմից պարբերաբար հրապարակվող վարկանիշներն ու կարծիքները աշխարհի երկրների ռազմական պոտենցիալի մասին հիմնականում հիմնված չեն լուրջ, գիտական-մասնագիտական հետազոտությունների վրա։
Սակայն սրա հետ միաժամանակ բազում են այն լրատվամիջոցները, որոնք ամենայն լրջությամբ անդրադառնում են նման վարկանիշներին։ Երկրների ռազմական հզորությունը չափող վարկանիշային ցուցակներից հատկապես ագրեսիվ Հայաստանում հաճախ տարածվում է Global Firepower Index «զեկույցը»: Գրում է «Ռազմ.ինֆո»-ն:
Կարելի է բավականին մանրամասն հիմնավորել, որ այդ վարկանիշն ուղղակի չի կարող իրականության հետ որևէ կապ ունենալ՝ հաշվի առնելով օրինակ՝ մի շարք երկրների ակնհայտ սխալ դիրքը աղյուսակում։ Հարցեր է առաջացնում նաև այն, թե հեղինակներն ինչ մեդոդաբանությամբ են կազմում աղյուսակը. Global Firepower Index-ի կայքում այդ մասին ոչինչ չկա։ Այնտեղ նշվում են միայն մոտ 50 գործոնները, որոնք իբր թե հաշվի են առնվում։
Սակայն իրականում այդքան մանրամասն քննության կարիք չկա էլ, քանի որ Global Firepower Index-ի կայքում հեղինակներն իրենք են սպիտակով սևի վրա գրել, որ կայքի բովանդակությունը ժամանցային նշանակության է: Այսինքն այն գիտական, վերլուծական և անգամ լրատվական որևէ արժեք չունի: Այն նախատեսված է բացառապես ժամանցի համար, և հեղինակները դա գաղտնի չեն պահում:
Հետևաբար այս վարկանիշի հիման վրա այս կամ այն երկրի զինված ուժերը վերլուծելն ըստ էության մասնագիտական անբարեխղճություն է, որի «արդյունքը» ընթերցողին մոլորեցնելն է։
Աղբյուր՝ «Ռազմ.ինֆո»