Այսօր լրանում է «Ծիծեռնակաբերդի առումը» գործողության երրորդ տարելիցը
Այսօր լրանում է «Ծիծեռնակաբերդի առումը» գործողության երրորդ տարելիցը
2018 թ. սեպտեմբերի 14-ին, ազգագրագետ Հարություն Մարությանը վարչապետ Նիկոլ Փաշինյանի որոշումով կազմված Հոգաբարձուների խորհրդի կողմից ընտրվեց «Հայոց ցեղասպանության թանգարան-ինստիտուտ» հիմնադրամի տնօրեն։
Հարություն Մարությանը (անվանափոխված տարբերակով՝ Քավություն Մաքրության) հասցրել է ապացուցել, որ բացարձապես չի տիրապետում Հայոց ցեղասպանության թեմային և չունի անհրաժեշտ կառավարչական հմտություններ՝ խիստ կարևոր հաստատությունը ղեկավարելու համար: Իր հիմնական առաքելությունը տեսնելով բոլորովին նոր, սակայն գիտականության առումով որևէ քննություն չբռնող տեսական ձևակերպումներ ամրագրելու մեջ, նա համառորեն փորձում է վերաձևակերպել ու վերանայել Հայոց ցեղասպանության պատմության գիտական մշակումներն ու հիմնավորումները, ամեն կերպ խուսափելով ցեղասպանության իրավական հետևանքների թեմային և բուն ցեղասպանության դրվագներին անդրադառնալուց:
Հաշվի առնելով այս երեք տարիների ընթացքում Հ․ Մարությանի կողմից թույլ տված հակաօրինական և հաստատության հեղինակությունը վարկաբեկող գործողություններն ու դրանց հետևանքները, ինչպես նաև այլ հակաօրինական գործողություններում ներգրավված լինելու փաստերը, Հարություն Մարությանին ներկայացնում եմ հետևյալ մեղադրանքները՝
1. Հայոց ցեղասպանության թանգարան-ինստիտուտի հեղինակությունը հակաօրինական գործողություններով վարկաբեկելու փորձեր, որոնք ներառում են՝
Ա․ հակաօրինական գործողություններ ՀՑԹԻ աշխատակիցների հանդեպ, որի արդյունքում տուժում է ՀՑԹԻ հեղինակությունը և խախտվում են աշխատակիցների իրավունքները,
Բ․ Կեղծ ու հակաօրինական փաստաթղթերի պատրաստում ու տրամադրում վերադասին՝ որի հետևանքով ԱԺ ամբիոնից ԿԳՄՍ նախկին նախարար Արայիկ Հարությունյանի կողմից հնչեցվել են անհիմն հայտարարություններ՝ ՀՑԹԻ-ից թանգարանային արժեքների անհայտացման մասին,
Գ․ Չհիմնավորված և թանգարանի կողմից ստորագրված պայմանագրերի դրույթները զանց առնող ու վարկաբեկիչ գործողությունների իրականացում,
2. Հայոց ցեղասպանության թանգարան-ինստիտուտի հետ առնչություն ունեցող առանձնապես խոշոր չափի գումարների և թանգարանային արժեքների անհայտացման փաստի կոծկում և հանցակցություն։
3. Հայոց ցեղասպանության պատմական փաստի անհերքելիության դրույթը խարխլող ձևակերպումների և հայտարարությունների շրջանառում, այդ թվում՝ միջազգային լսարանի առջև։
4. Շահադիտական նպատակներով ՀՑԹԻ-ում կառուցվածքային փոփոխությունների իրականացում՝ այլ կազմակերպության կողմից դրամաշնորհային ծրագրին մասնակցելու հնարավորությունը դյուրացնելու համար։
Վերոնշյալ մեղադրանքների պահով հայտնում եմ իմ պատրաստակամությունը ԶԼՄ-ներին և իրավապահ մարմիններին համապատասխան փաստեր ու վկայություններ տրամադրելու համար, ինչպես նաև չորրորդ անգամ հրավիրում եմ Հարություն Մարությանին և Հոգաբարձուների խորհրդի անդամներին բաց ասուլիս-բանավեճի՝ Ծիծեռնակաբերդում իրագործված կոռուպցիոն գործարքի մանրամասնությունները հանրայնացնելու համար։
Վերոնշյալ մեղադրանքները հավասարապես հասցեագրվում են ՀՑԹԻ Հոգաբարձուների խորհրդի ներկա և նախորդ անդամներին։
Հ․ Գ․ ՀՑԹԻ տնօրենը, ՀՑԹԻ Հոգաբարձուների խորհրդի նախագահը, ինչպես նաև Հոգաբարձուների խորհրդի մի քանի անդամներ, տարբեր տարիների ընթացքում ներգրավված են եղել հայ-թուրքական հաշտեցմանն ուղղված դրամաշնորհային ծրագրերում․․․
ՄԵԿՆԱԲԱՆՈՒԹՅՈՒՆՆԵՐՆ ԱՎԵԼՈՐԴ ԵՆ․․․
Հայկ Դեմոյանի Ֆեյսբուքյան էջից