«Հայաստան» դաշինքի՝ Փարաքար համայնքի շտաբի ղեկավարին բերման ենթարկելու ոչ մի իրավական հիմք չկա. շտաբի ներկայացուցիչ. Տեսանյութ
Փարաքար համայնքի շտաբից բերման է ենթարկվել «Հայաստան» դաշինքի շտաբի պետը: Պաշտոնապես նշվում է, որ նա բերման է ենթարկվել բաց քվեարկության համար, իսկ շտաբից հայտնում են, որ պատճառն ամենևին էլ դա չի եղել:
«Հայաստան» դաշինքի շտաբի ներկայացուցիչ Սևակ Ղազարյանը Tert.am-ի հետ զրույցում պատմեց, որ շտաբի պետը ընտրատեղամաս է գնացել ընտրության, մոտեցել է ոստիկաններին, բարևել, զրուցել, ընթացքում նրան բռնի ուժով նստեցրել են մեքենան ու տարել՝ իր ընտանիքի անդամների ու շտաբի պետի ներկայությամբ: Սևակ Ղազարյանը նշում է, որ իրենք տեղյակ չեն, թե շտաբի պետը ոստիկանների հետ ինչ է խոսել: Ըստ Սևակ Ղազարյանի՝ բաց քվեարկության մասին լուրերը հերյուրանքներ են, և իրենք տեղյակ չեն՝ ինչ է կատարվում և ինչու են տարել շտաբի պետին: Նրա խոսքով՝ որևէ իրավական հիմք չի կարող լինել:
Շտաբի ներկայացուցիչը հատնեց, որ իրենք չեն կարողանում կապ հաստատել շտաբի պետի հետ և տեղյակ չեն, թե երբ ազատ կարձակեն նրան: Սևակ Ղազարյանի խոսքով՝ համայնքում ոչ մի լարվածություն չկա, և ընտրություններն անցնում են հանգիստ մթնոլորտում: Համայնքում քվեաթերթիկների վրա նշումների դեպքեր չեն հայտնաբերվել:
Նրա խոսքով՝ սրանք «Հայաստան» դաշինքի վրա ճնշում գործադրելու փորձեր են: