Թուրքիայի կողմից ջրամբարների կառուցումը խնդիրներ է ստեղծում Հայաստանի համար. Լևոն Ազիզյան

Ջrրային ռեսուրսների տեսանկյունից Արաքս-Ախուրյան հատվածում խնդիրներ կան, եւ դրանք կապված են Թուրքիայի կողմից ջրամբարների կառուցման հետ: Այս մասին մարտի 23-ին լրագրողների հետ հանդիպման ժամանակ ասաց «Հիդրոօդերեւութաբանության եւ մոնիտորինգի կենտրոն» ՊՈԱԿ-ի տնօրենի ժամանակավոր պաշտոնակատար Լեւոն Ազիզյանը:

«Պատահական չէ, որ այսօր Ախուրյանում մենք նախորդ տարվա համեմատ 100 միլիոն խորանարդ մետրով քիչ ջուր ունենք: Թուրքիան 2012 թվականից ջրամբարի շինարարություն է սկսել Արաքս գետի մոտ: Այդ կապակցությամբ ջրային ռեսուրսները 30-40 տոկոսով նվազել են»,- ասաց նա:

Ազիզյանի խոսքով՝ ջրային ռեսուրսների տեսանկյունից լուրջ խնդիր է կլիմայի փոփոխությունը՝ տաքացման տեսքով, որը գրանցվում է 1994 թվականից ի վեր:

«Կանխատեսվում է, որ մինչեւ 2040 թվականը ջրային ռեսուրսների խոցելիությունը նորմի նկատմամբ կնվազի 15 տոկոսով, 2070-ին՝ 20-25 տոկոսով, 2100-ին՝ 35-40 տոկոսով»,- շեշտեց նա:

Աղբյուր՝ NEWS.am