Սարսափելի վթարից փրկված 15-ամյա երեխայի վիճակը բավարար է

Մարտի 14-ին  Արագածոտնի մարզում ողբերգական վթարից փրկված 15-ամյա  տղայի վիճակը բավարար է, նա  վերակենդանացման բաժանմունքից դուրս է գրվել: Այս մասին NEWS.am-ին հայտնեց Սուրբ Աստվածամայր ԲԿ-ի մամուլի խոսնակ Գեւորգ Դերձյանը:

Նա նշեց, որ պատանին կոնքի ոսկորի կոտրվածք ուներ ու շոկային վիճակում էր գտնվում, իրենց մոտ է տեղափոխվել ծայրահեղ ծանր վիճակում:

Ավելի վաղ հայտնել էինք, որ մարտի 14-ին խոշոր եւ ողբերգական վթար էր տեղի ունեցել Արագածոտնի մարզում: Ժամը 19:40-ի սահմաններում, Opel մակնիշի ավտոմեքենան, Երևան-Գյումրի ավտոճանապարհի 67 կմ հատվածում՝ դեպի Թալին ընթանալիս, դուրս է եկել հանդիպակած երթևեկելի գոտի, ծառը արմատից կոտրել, բախվել մի քանի քարերի, և մի քանի պտույտ շրջվելով, հայտնվել դաշտում: Մեքենայում գտնվող 5 անչափահասներից 4-ը մահացել էին:

Ոստիկաններն ու քննիչները պարզել են` ավտոմեքենան վարել է Արցախի Հանրապետության Քաշաթաղի շրջանի բնակիչ, 15-ամյա Արթուր Հ.-ն:  

Վթարի հետևանքով ուղևորներ, Թալինի բնակիչներ, 15-ամյա Մարատ Խ.-ն, 15-ամյա Յուրի Ա.-ն, 15-ամյա Էդգար Գ.-ն, 15-ամյա Սարգիս Ա.-ն և վարորդ Արթուր Հ.-ն տեղափոխվել են «Թալին» բժշկական կենտրոն, որտեղ Սարգիս Ա.-ն, Յուրի Ա.-ն, Մարատ Խ.-ն և Էդգար Գ.-ն մահացել են:  

Մեր տեղեկություններով բոլոր երեխաները սովորում էին Թալինի թիվ 2 դպրոցի 9-րդ դասարանում, համադասարանցիներ էին: