Ժողովին ֆիզիկապես ներկա էր Արմեն Խաչատրյան պատգամավորը, բայց հավանաբար գլուխը թողել էր Երեւանում.Քաջարանի քաղաքապետ

Պատերազմի առաջին օրերից Քաջարանի երկրապահ կամավորականների 45 հոգանոց ջոկատով մեկնեցինք Արցախ, մեզ ուղարկեցին Ջաբրայիլ` առաջնագիծ, մեր ջոկատը շրջափակման մեջ ընկավ, միայն հմուտ ռազմավարության շնորհիվ կարողացանք խուսափել մարդկային կորուստներից, սակայն, ցավոք, երկու հոգի վիրավորվեցին։ Այս մասին այսօր՝ մարտի 16-ին, NEWS.am-ի հետ զրույցում ասաց Քաջարանի քաղաքապետ Մանվել Փարամազյանը։

Հիշեցնենք, որ «Իմ քայլը» խմբակցության պատգամավոր Արմեն Խաչատրյանը լրագրողների հետ զրույցում հայտարարել է, որ պատերազմի ժամանակ երկիրն այն վիճակում էր, որ Սյունիքի համայնքապետերը պետք է ջոկատներ կազմեին ու մասնակցեին երկրի պաշտպանությանը, սակայն չի արվել նման գործողություն։

«Երբ վտանգված է հայրենիքդ, մի՞թե այլ կերպ կարող է լինել։ Արցախյան երկրորդ պատերազմում Քաջարանը 19 զոհ տվեց։ Առաջնագիծ մեկնելիս Գորիսում մեզ տրամադրեցին ինքնաձիգեր՝ առանց փամփուշտների, ջոկատի բոլոր կարիքները, ներառյալ՝ ռազմամթերքը հոգացել ենք մեր ուժերով, բարերարների աջակցությամբ, ԶՊՄԿ֊ի շնորհիվ»,- նշեց Փարամազյանը։

Նա պատմեց, որ հոկտեմբերի 18֊ին վարչապետ Նիկոլ Փաշինյան հրահանգով համայնքապետերը սեփական միջոցներով կամավորական ջոկատներ են կազմել՝ ինքնապաշտպանության նպատակով.

«Այնուհետեւ հոկտեմբերի 18֊ին գերագույն գլխավոր հրամանատարի լիազորությամբ օժտված անձը Գորիսում համայնքապետերին հրահանգեց սեփական միջոցներով կամավորական ջոկատներ կազմավորել Սյունիքի ինքնապաշտպանության նպատակով։ Այդ ժողովին ֆիզիկապես ներկա էր Արմեն Խաչատրյան պատգամավորը, բայց հավանաբար գլուխը թողել էր Երեւանում։ Եվ առհասարակ, պատերազմի ողջ ընթացքում դրանց ծպտունը չէր լսվում, ո՞վ է դրանց տեսել, ի՞նչ խնդիր են լուծել, կարո՞ղ են նայել զոհվածի ծնողի կամ վիրավորի աչքերի մեջ, կամ էլ առանց թիկնազորի շրջել Սյունիքում։ Քաջարանում հիշյալ պատգամավորը եւ իշխող թիմի ցանկացած խոսափող համարվում է persona non grata, ավելին չմանրանամ»։

Քաջարանի քաղաքապետը պատմեց, որ հոկտեմբերի 20֊ին իր մարտակոչով ձեւավորվել է Քաջարանի գումարտակը եւ իր հրամանատարությամբ մեկնել Կովսականի (Զանգելանի) դիրքեր` դարձյալ իրենց նյութական միջոցներով. «5 օրում գումարտակում կամավորագրվեցին 270 քաջարանցի հերոս մարտիկներ։ Դիրքերը պահում էինք հերթափոխով։ Շտապ ձեռնամուխ եղանք պաշտպանական հենակետերի շինարարական֊ինժեներական աշխատանքներին, ստորգետնյա խրամուղիներ, անվտանգ խրամատներ, նույնիսկ բժիշկ, վիրաբույժ ունեինք, ընդհուպ` վիրահատական հարմարություններով, զենք, զինամթերք, որակյալ սնունդ»։

Քաղաքապետն ասաց, որ իր գումարտակից զոհվել է 2 հոգի, վիրավորվել՝ 6֊ը. «Թեժ մարտեր եղան, դավադիր շրջափակման մեջ ընկանք, երբ փորձեցինք նահանջել, թիկունքում հետդարձի կամուրջը պայթեցրել էր ներքին թուրքը։ Պատերազմի մանրամասներին դեռ հանգամանորեն կանդրադառնամ։ Կպատմեմ մեր տեսածը, մեզ հետ կատարվածը, մեր ցավն ու ողբերգությունը, որը հասու չէ իշխանական վախկոտ մունետիկների ուղեղներին։ Եվ բարոյական չէ, նամանավանդ տղամարդավայել չէ դատողություններ անել իրենց չմասնակցած պատերազմի շուրջ։ Մենք դեռ չլուծված խնդիրներ ունենք, այս իշխանությունից աջակցություն ու սպասելիքներ չունենք, թող իրենց կողմից հավելյալ խնդիրներ չբարդեն մեզ վրա, ոտի տակ չընկնեն, թիկունքից չխփեն»։

Անդրադառնալով Կապանի դիրքերի աղմկահարույց տեսանյութին՝ Փարամազյանը նշեց, որ այդպիսի հրապարակումը սպասելի էր. «Մեր շահեկան դիրքերը կասկածելի, ազգադավ մի գործարքով հանձնվեց թշնամուն, հիմա թուրքը մեր դռան շեմին է, մեր հույսը մեզ վրա է ու մեր Աստծո, իսկ պիղատոսյան անտարբերությամբ այս ամենին հետեւողները իմանան, որ էս ուղտը մի օր էլ իրենց դռանն է չոքելու, սա մի ցանկապատի կռիվ չէ, մեր պատմական, նյութական, հոգեւոր հայրենիքի փրկության պայքարն է, ուշքի եկեք»։

Աղբյուր՝ NEWS.am