Կնոջ վրա դրված է կրկնակի պատասխանատվություն ապագայի համար, կինն ունի հստակ առանձնահատկություն՝ Աստծո կողմից տրված․ կինն է ապահովում մարդկության ապագան․ Լ․ Ալավերդյան
Իմ խնդիրը միշտ եղել է թե՛ ուսանողներիս, թե՛ շրջապատիս կանանց բացատրել՝ ոչ թե դու հասել ես ինչ-որ բանի, այլ միշտ պետք է ձգտես կատարելության: Այս մասին Tert.am-ի հետ զրույցում ասաց իրավապաշտպան Լարիսա Ալավերդյանը:
«Ես միշտ ուսանողներիս ասում եմ՝ դուք պետք է ձգտեք կատարելության: Մենք բոլորս պետք է ձգտենք այն կերպարին, որը մեզ համար գուցե անհասանելի է, բայց ինքնին ձգտումը հենց դարձնում է կնոջ պատկերը շատ ավելի ընդունելի»,- ասաց Լարիսա Ալավերդյանը:
Կանանց իրավունքների պաշտպանության օրը իրավապաշտպան Լարիսա Ալավերդյանը նշեց՝ մեծագույն ցանկությունը հայհոյանքի վերացումն է:
«Ես չգիտեմ՝ որտեղից է հայտնվել հայհոյելու այդ մշակույթն ու սովորությունը, ընդ որում, կանանց կողմից, ես դա համարում եմ ապտակ հայ կնոջ պատկերին: Մեծ պահքի օրեր են, բայց դա էլ չի ազդում»,- ասաց տիկին Ալավերդյանը:
Նա նաև նշեց, որ չի դադարում հիանալ հայ կնոջով և նրա կերպարանքով, որը տեսել է ողջ կյանքի ընթացքում՝ պատերազմի ժամանակ, խաղաղ օրերին․ «Մենք ունենք այն իդեալները, որոնց պետք է ձգտենք»,- ասաց նա:
Իրավապաշտպանը նաև անդրադարձավ մերօրյա իրականության մեջ հայ կնոջ կարևորությանը, Հայաստանի համար այս բարդ ժամանակաշրջանում:
«Թող տղամարդիկ չնեղանան, բայց ես կարծում եմ՝ կնոջ վրա դրված է կրկնակի պատասխանատվություն ապագայի համար, կինը ունի այն հստակ առանձնահատկություն՝ Աստծո կողմից տրված՝ կինն է ի վերջո ապահովում մարդկության ապագան»,- ասաց Լարիսա Ալավերդյանը:
Հետևեք մեզ Facebook-ում