«Ով կուզի թող հաչա, Լֆիկի գործերը աջ ա»․ Սամվել Ալեքսանյանը նոր մոլ է կառուցում

Politik.am-ը գրում է. «Նիկոլ Փաշինյանը հանրության լայն շերտերի վստահությունը վաստակեց այն բանի շնորհիվ, որ մշտապես խոսում էր ժողովրդին թալանած օլիգարխների մասին։ Փաշինյանի թիրախում ամենաշատը հայտնվում էր ՀՀԿ-ական օլիգարխ Սամվել Ալեքսանյանը կամ ինչպես ընդդիմադիր Փաշինյանն էր սիրում ասել՝ Լֆիկ Սամոն։ Փաշինյանն ամենատարբեր մեղքերի մեջ էր մեղադրում նրան։ Ալեքսանյանը նրա կողմից մեղադրվեց անգամ սպանության պատվեր տալու մեջ։

Իշխանության գալով Նիկոլ Փաշինյանը փոխեց իր դիրքորոշումը մի քանի օլիգարխների և հատկապես Սամվել Ալեքսանյանի նկատմամբ։ Նրանք դարձան ժողովրդի վարչապետի սիրելի խոշոր սեփականատերերը, որ կարող էին հանգիստ վայելել ժողովրդից թալանած միլիարդները (ի դեպ թալանի մասով պնդումները Փաշինյանինն են)։

Մարտի 1-ի հանրահավաքին Փաշինյանը նորից հիշել էր «ժողովրդին թալանողներին»։ Նրան հավատացողները կրկին բացականչություններով դիմավորեցին իրենց տոտեմի խոսքերը։ Ու մինչ «ժողովուրդը» հույս է փայփայում, որ իրենից «գողացվածը» Փաշինյանը մի օր կոպեկ-կոպեկ վերադարձնելու է, այդ ընթացքում Սամվել Ալեքսանյանը նոր մոլ է կառուցում։ Այս անգամ Տիգրան Մեծ փողոցի վրա։  

Հիմա արդեն ակնհայտ է, որ Սամվել Ալեքսանյանի գործերը շատ ավելի լավ են Նիկոլ Փաշինյանի իշխանության օրոք։ Փաշինյանի իշխանության ընթացքում Երևան քաղաքում Սամվել Ալեքսանյանը թվով երրորդ մոլն է կառուցում։ Ըստ էության նա դառնում է 1 միլիոնից ավել բնակչություն ունեցող Երևանի մանրածախ առևտրի մոնոպոլիստը՝ Հայաստանի մանրածախ առևտրի թիվ մեկ մոնոպոլիստը։ Ու հիմա որքան էլ Փաշինյանը խոսի «ժողովրդից թալանածի» վերադարձի մասին և որքան էլ դրանից ամբոխը օրգազմ չստանա՝ Ալեքսանյանը շարունակում է նրանց հաշվին միլիոններ դիզել։  Կարճ ասաց՝ «ով կուզի թող հաչա, Լֆիկի գործերը աջ ա»»։