Տարոն Մարգարյանի առանձնատան հասցեն է անգամ «գոլդ»

«Հայկական ժամանակ» թերթը գրում է. «Հայաստանում պաշտոնյաները եւ օլիգարխները իրենց անձնական ավտոմեքենաներին «գոլդ» համարներ կպցնելու հոբբի ունեն: Ձեռքի մատների վրա հաշված պաշտոնյաներ կգտնվեն, որ այս տենդենցին չեն տրվել: «Գոլդ» համարանիշներով ավտոմեքենաներով վաղուց արդեն ոչ ոքի չես զարմացնի: Պարզվում է, սակայն լինում են նաեւ «գոլդ» համարներով տան հասցեներ: Դա, ավտոմեքենաների համարանիշների համեմատ մի քանի մակարդակ բարձր շքեղություն է, որը ոչ բոլորը կարող են իրենց թույլ տալ:

Այդպիսի, հնարավորություն ունենալու համար պետք է առնվազն Երեւանի քաղաքապետ լինել: Օրինակ, Երեւանի երկարամյա գործող քաղաքապետ, առաջիկա ավագանու ընտրություններում ՀՀԿ-ի քաղաքապետի թեկնածու Տարոն Մարգարյանի առանձնատան հասցեն նախանձելի շքեղ է՝ 77/7: Բաբաջանյան փողոցում Մարգարյանների հարեւանի տան հասցեն շարքային հասցե է`«Բաբաջանյան 20 տուն»: Խղճուկ, կարելի է ասել:

Նրանց քաղաքապետ հարեւանը չէր կարող չէ՞ հանդուրժել, որ իր տան հասցեն լիներ, ասենք` «Բաբաջանյան 22 տուն» կամ` «Բաբաջանյան 18 տուն»: Ոչ`«Բաբաջանյան 77/7» եւ վերջ: Ինչպե՞ս է եղել, որ Տարոն Մարգարյանենց առանձնատան հասցեն այսքան տպավորիչ է ստացվել: Այս հարցը պետք է պարզաբանեն Ավան վարչական շրջանի ղեկավար Արթուր Ջավադյանն ու Երեւանի քաղաքապետարանի տեղեկատվության եւ հասարակայնության հետ կապերի վարչության պետ Արթուր Գեւորգյանը»: Առավել մանրամասն՝ թերթի այսօրվա համարում