«Եթե նա առանց ստիպելու գնացել է այս զիջմանը, ապա ուրիշ շահեր է հետապնդել». Աղասի Ենոքյան

 «Այս մակարդակի դավաճանությունը պարզապես չի տեղավորվում մարդկային տրամաբանության մեջ, բայց բացահայտված հուշագիրը և հունվարի 11-ի մոսկովյան փաստաթուղթն ապացուցում են, որ իրականում սա դավաճանություն է, ընդ որում, շարունակվող դավաճանություն։

Նոյեմբերի 9-ի թուղթը և այս թղթերը գրված ապացույցներ են դավաճանության և այնպես չէ, որ մեկն ասի, թե զգուշացրել են պարտության մասին, մյուսն ասի՝ չգիտեինք, մեկն ասի՝ Աննան բունկերում հանձնում էր Հադրութը, մյուսն ասի` Աննան այնտեղ չէր, և այլն։

Իսկ այս գրված փաստաթղթերից վերջին երկուսն առանձնակի ցինիկ ապացույց են դավաճանության։ Եթե նոյեմբերի 9-ի փնթի թուղթը, որը միջազգային փաստաթուղթ էլ չէր կարելի կոչել, այլ միայն Հայաստանի պատրաստակամություն իր զորքերին հանելու և ադրբեջանցիների ու ռուսների զորքերի մուտք գործելու մասին, գրված էր պատերազմի ժամանակ, և կարելի է համարել՝ պատերազմն օր առաջ ավարտելու համար էր, ապա մյուս երկուսի բնույթը բացարձակ դավաճանական է։

Ոչ ոք չէր կարող ստիպել Նիկոլին, որ զորքերը հաներ Զանգելանից և Կուբաթլուից․ դիրքերի վերաբերյալ կար նոյեմբերի 9-ի թուղթը և արդեն ռուսական զորքերը մտել էին ռեգիոն։ Ոչ ոք չէր կարող ստիպել, որ սկսի սահմանների դեմարկացիա կոնկրետ կոորդինատներով և Գորիս-Կապան ճանապարհը թշնամու հսկողության տակ մտցներ: Եթե նա առանց ստիպելու գնացել է այդ զիջումներին, ապա ուրիշ շահեր է հետապնդել․ այլ բացատրություն չկա։

Ոչ ոք չէր կարող ստիպել Նիկոլին, որ գերիների հարցը մտցներ բանակցությունների մեջ․ դա քաղաքական հարց չի կարող լինել, դա հումանիտար հարց է և կարգավորվում է միջազգային հումանիտար իրավունքով և հումանիտար կազմակերպությունների կողմից։ Առավել ևս ոչ ոք չէր կարող ստիպել, որ այս հարցը դարձնելով քննարկման լծակ, և այստեղ ոչնչի չհասնելով, նա զիջի Ադրբեջանի, Թուրքիայի և ողջ թյուրքական աշխարհի համար կենսական Մեղրիի միջանցքը, ըստ էության, ոչնչի դիմաց։ Եթե նա առանց ստիպելու գնացել է այս զիջմանը, ապա ուրիշ շահեր է հետապնդել․ այլ բացատրություն չկա։

Ու քանի որ տրամաբանությունը պարզ չէ, ապա ոչ մի երաշխիք չկա, որ դավաճանությունը չի ավարտվել։ Իսկ այժմ իշխանությունը ձեռնարկել է քաղաքացիներին ու մամուլին լռեցնելու նոր ինտենսիվ արշավ։ Այդ թվում են, պայմանական ասած, «Նիկոլ դավաճան» ասելն արգելող օրենքը, թելեգրամ-ալիքներին հղումներն արգելող օրենքը, և վերջապես՝ Սյունիքի հարցով նոր «Արծրուն» է նշանակվել՝ այսուհետև այս մարզի ինֆորմացիան պետք է ճշտել ԱԱԾ-ի հետ։

Այս ամենը լուրջ նախազգուշացում է, որ նոր դավաճանություն է նախապատրաստվում, նոր փաստաթղթեր կամ բանավոր պայմանավորվածություններ են ի հայտ գալու նոր տարածքային զիջումների մասին»։

Աղասի Ենոքյանի ֆեյսբուքյան էջից