Գորիս-Կապան ճանապարհի 21 կմ «ադրբեջանական է», Մարտունիում Նժդեհի արձանի ապագան. ԱԺ խմբակցությունների ճեպազրույցները. Տեսանյութ

Դուք գիտեք, որ, օրինակ՝ Գորիս-Կապան ճանապարհի 21 կմ հատվածն անցնում է Հայաստանի միջազգայնորեն ճանաչված սահմաններից դուրս՝ այսինքն՝ Ադրբեջանի միջազգայնորեն ճանաչված տարածքով, բայց ոչ մի վայրկյան այդ ճանապարհը չի փակվել: Այս մասին Ազգային ժողովում լրագրողների հետ զրույցում ասաց «Իմ քայլը» խմբակցության պատգամավոր Հայկ Գևորգյանը` անդրադառնալով Սյունիքի մարզի ճանապարհներին վերաբերող մտահոգություններին:

«Դա այնպես չէ, որ համաձայնագրերով պետք է լինի, դա պայմանավորվածությունների արդյունք է, որ այդ ճանապարհը պետք է գործի և գործում է, ոչ մի վայրկյան ադրբեջանցիների կողմից չի փակվել այդ ճանապարհը»,-ասաց նա:

«Իմ քայլը» խմբակցության պատգամավոր Սիսակ Գաբրիելյանն էլ հարցին, թե, այսինքն` անհանգստացնող բան չի՞ տեսնում Սյունիքում, ասաց, որ կխաբի, եթե ասի, թե անհանգստացնող բան չկա: «Միանշանակ անհանգստացնող բան կա Սյունիքում, սյունեցիների մոտ կա, հասկանալի է, որ առնվազն 25-30 տարին չկար նման իրավիճակ, հիմա կա»,-ասաց նա:

ԱԺ ճեպազրույցի ընթացքում ասաց «Լուսավոր Հայաստան» խմբակցության պատգամավոր Տարոն Սիմոնյանն իր հերթին անդրադառնալով Արցախին ու Սյունիքին վերաբերող հայտարարության տեքստին, որը տարածվել է համացանցում նշեց, որ իշխանությունից պահանջում էինք հոդաբաշխ ձևով բացատրություն տալ՝ ինչ գաղտնի փաստաթղթի մասին է խոսքը;

«Եթե անգամ այն ստորագրված լինի գործադիր իշխանության ղեկավարի, կամ որևէ ներկայացուցչի կողմից, սա ոչ միայն հակապետական, հակաազգային փաստաթուղթ է, այլ իրավունքի կոպիտ խախտում ունեցող և իրավաբանական ուժ չունեցող փաստաթուղթ է: Այդտեղ կարգավորում են հարաբերություններ, որոնք միջազգային պայմանագրային կարգավորման առարկա են, իսկ մեր Սահմանադրության և միջազգային պայմանագրերի ՀՀ օրենքի համաձայն նմանատիպ փաստաթղթերը ուժ ստանալու համար պետք է անպայմանորեն ՍԴ և ԱԺ մտնեն և վավերացվելուց հետո միայն ունենան կիրառական նշանակություն: Մինչդեռ այնտեղ նշված փաստերը վկայում են, որ մինչև դեկտեմբերի 18-ը արդեն կոնկրետ գործողություններ կատարվել են»,- մանրամասնեց նա:

Տարոն Սիմոնյանը նշեց, որ հակազգային և հակապետական է նաև այն, որ փաստաթղթում նշված դրույթներն ուղղակիորեն ոչնչացնում են Արցախի հարցի ինքնորոշման ուղղված պետական քաղաքականությունը, որը վարվել է այս տասնամյակների ընթացքում: Նա նաև նշեց, որ հակազգայնի և հակապետական է փաստաթղթում օգտագործված բառապաշարը։

Տարոն Սիմոնյանն անդրադարձավ նաև Մարտունակում Գարեգին Նժդեհի արձանի ապամոնտաժման մասին շրջանառվող տեղեկություններին: Ըստ նրա՝ այս հարցի շուրջ ևս պետք է հոդաբաշխ, սպառիչ բացատրություն տրվի:

«Որևէ ազգ, որևէ պետություն չի կարող և իրավունք էլ չունի ոտքերը սրբել մեր արժանապատվության վրա, ազգերի ինքնորոշման իրավունքը ենթադրում է նաև մշակութային ինքնորոշում: Յուրաքանչյուր ազգ ինքն է որոշում ինչ հերոսներ ունենա, ինչ մշակութային արժեքներ և ինչ գաղափարներ դավանի: Այս հարցում մենք զիջելու տեղ չունենք»,-եզրափակեց նա:

Մանրամասները՝ տեսանյութերում:

Zham.am