Անդրեյ Ռուդենկոն խոսել է ԵԱՀԿ ՄԽ եռանախագահության ապագայի և Թուրքիայի ներկայության մասին Հարավային Կովկասում

Ռուսաստանի ԱԳ նախարարի տեղակալ Անդրեյ Ռուդենկոն կարծում է, որ Ղարաբաղյան կարգավորման հարցով ԵԱՀԿ Մինսկի խմբի համանախագահների գործունեությունը պետք է շարունակվի, քանի որ նրանք նրանք կարևոր ներդրում են ունեցել Ղարաբաղյան հակամարտության կարգավորման հիմնարար սկզբունքների մշակման գործում, որոնցից շատերն արտացոլվել են 2020 թվականի նոյեմբերի 9-ի հայտարարության մեջ: Այս մասին ռուս բարձրաստիճան դիվանագետը ասել է «ՏԱՍՍ» լրատվական գործակալության հետ զրույցի ընթացքում, փոխանցում է «Հրապարակ»-ը։

Նա նաեւ արձանագրել է, որ նախկինի նման մնում է պահանջված համապարփակ քաղաքական կարգավորման հասնելու խնդիրը, որը ԵԱՀԿ Բուդապեշտի գագաթնաժողովի (1994 թվական) որոշումներով դրված է Մինսկի խմբի համանախագահության վրա: Անդրեյ Ռուդենկոն նշել է, որ Մինսկյան եռյակը միջազգային ուժեղ աջակցություն ունի և կարող է օգտակար լինել հետագա քայլերի, այդ թվում՝ կարգավիճակի վերաբերյալ հարցերի, փոխընդունելի մոտեցումների մշակման համար: Բայց եւ այնպես, նա շեշտել է, որ պետք է լինել զգուշավոր, առանց ավելորդ շտապողականության, մինչեւ ժամանակը գա։ Իսկ ահա կոնկրետ ներկայի մասով, ըստ Ռուդենկոյի, ԵԱՀԿ Մինսկի խումբը և նրա համանախագահները կարող են ակտիվություն դրսևորել հայերի և ադրբեջանցիների միջև վստահություն ստեղծող քայլեր ձեռնարկելու գործում: Նա կարեւորել է քաղհասարակության շրջանում երկխոսության ծավալումը, քանի որ համոզված է, որ այն կնպաստի տարածաշրջանում իրավիճակի ընդհանուր բարելավմանը և քաղաքական ուղու վրա հետագա քայլերի նախադրյալների ստեղծմանը։

Անդրադառնալով այն հարցին, թե արդյոք Մոսկվայի համար զգաստացնող չէ Թուրքիայի ներկայությունը Հարավային Կովկասում, փոխնախարար Ռուդենկոն ասել է, որ Մոսկվան ելնում է այն փաստից, որ «տարածաշրջանում ռազմական գծով Անկարայի հետ ռուսական կողմի փոխգործակցությունը կառուցվում է Ղարաբաղյան հակամարտության գոտում հրադադարի վերահսկման ռուս-թուրքական համատեղ կենտրոնի շրջանակներում, որը հունվարի 30-ից գործում է Աղդամում», ըստ էության հասկացնելով Թուրքիայի ներկայության սահմանները եւ դրանից դուրս արդեն կարմիր գծերի առկայությունը։