Ես սա համեմատում եմ ռեստորանում սպասարկման հետ. մատուցողը մոտենում է, բայց ժամերով պատվերը չի գալիս. Խաժակյան

Մշտապես խոսվել է, որ հաստիքացուցակներն ուռճացված են եւ մենք պետք է գնանք այն օպտիմալացնելու ճանապարհով: Այս մասին, այսօր՝ փետրվարի 9-ին, Երեւանի ավագանու նիստում նշել է «Լույս» խմբակցության ղեկավար Դավիթ Խաժակյանը՝ անդրադառնալով քաղաքապետարանի քարտուղարության կառուցվածքային փոփոխություն ենթադրող նախագծին, որով հաստիքներն ավելանում են 10-ով:

«Կոնսենսուսն իմ տպավորությամբ այն էր, որ պետք է գնանք նվազեցման միտումով, բայց հիմա հակառակն ենք տեսնում: Այս երկու տարիներին անընդհատ ավելացնում ենք հաստիքացուցակը, ամեն անգամ համարում ենք, որ դա հիմնավոր է:

Մեր բոլորի, այդ թվում քաղաքապետի խնդիրը պետք է լիներ կատարել կառուցվածքային փոփոխություններ, բայց չնպաստել թվաքանակի եւ ծախսերի ավելացմանը: Այսինքն մենք ունենք 10 մլրդ դրամի կրճատում մեր բյուջեում, բայց հիմա 30 մլն դրամ ավելացնում ենք այս 10 հաստիքի ավելացման վրա:

Եթե մարդիկ սկսում են շատ զանգահարել թեժ գիծ, դա չի նշանակում, որ պետք է Թեժ գծի աշխատանքն արդյունավետ դարձնենք, դա նշանակում է, որ պետք է նայենք, թե ինչն է խնդիրը, որ մարդիկ ավելի շատ են բողոքում: Ես այս փոփոխությունը համեմատում եմ ռեստորանում սպասարկման հետ. պատկերացրեք, որ մատուցողը մոտենա, լավ սպասարկի, բայց ժամերով պատվերը չգա: Հիմա մենք ասում ենք, որ փաստաթղթերի ընդունումն այս փոփոխությամբ կդառնա ավելի արդյունավետ, բայց միեւնույն է, այն խնդիրը, որոնք մարդը դիմում է, այդ խնդիրը մնում է բաց»,-ասաց նա:

Zham.am