Նախատեսվում է, որ Արմեն Սարգսյանը շաբաթվա վերջին կլինի Հայաստանում
ՀՀ նախագահ Արմեն Սարգսյանը շաբաթվա վերջին կլինի Հայաստանում և բուժումը կշարունակի այստեղ։ Այս մասին «Հրապարակին» հայտնեց ՀՀ նախագահի օգնական Հասմիկ Պետրոսյանը։
«Նախատեսվում է, որ շաբաթվա վերջ, բժիշկների համապատասխան ցուցումների պարագայում, անպայման կվերադառնա և բուժումը կշարունակի Երևանում»,-ասաց Հասմիկ Պետրոսյանը։
Հիշեցնենք, որ Արմեն Սարգսյանը 2020թ․ դեկտեմբերից գտնվում է Լոնդոնում, որտեղ նա վարակվել էր կորոնավիրուսով և հոսպիտալացվել։ Նրա մոտ եղել էին բարդություններ։
«Հրապարակը» տեղեկություններ ուներ, որ նախագահը Նիկոլ Փաշինյանի հետ խոսակցություն էր ունեցել՝ խնդրելով, որ սահմանադրական փոփոխություններով գոնե մի քիչ իր լիազորություններն ավելացվեն։ Փաշինյանն էլ պատասխանել էր, թե Սահմանադրության փոփոխությունների ժամանակ չկա։
Հարցն ուղղեցինք Հասմիկ Պետրոսյանին: «Ոչ, նման բան չկա, նախագահը վարչապետին չի դիմել նման հարցով։ Նախագահը բազմիցս իր հրապարակային խոսքում նշել է, որ սահմանադրական փոփոխությունների կարիք կա։ Բայց վարչապետին այդ հարցով դիմել՝ ոչ»,-ասաց Հասմիկ Պետրոսյանը։
Հետևեք մեզ Facebook-ում