Հայաստանում մեծ թվով պետական կառույցները, որպես կանոն, արագ արձագանքում են միայն իրենց ղեկավարներին ուղղված քննադատություններին. Տիգրան Աբրահամյանն իր հնչեցրած հարցերի մասին

Օրեր առաջ՝ փետրվարի 1-ին, անդրադարձել էի ՌԴ ՊՆ պաշտոնական կայքում զետեղված պաշտոնական հաղորդագրություններից մեկին, որով տեղեկացում էր, որ հունվարի 30-ին, ՀՀ ԱԱԾ-ի կողմից, Սյունիքի մարզի Տեղ գյուղի տարածքում ձերբակալված 2 ադրբեջանցի զինծառայողները, ռուսական կողմի միջնորդությամբ, փետրվարի 1-ին փոխանցվել են Ադրբեջանին։

Թեմայի հետ կապված հիմնական հարցադրումս վերաբերվում էր ձերբակալման փաստին, հանգամանքներին, հապճեպ Ադրբեջանին վերադարձնելուն և վերոնշյալ միջադեպի՝ ՌԴ պաշտոնական խողովակներով, հայ հանրությանը հայտնելուն։

Միջադեպից անցել է 5 օր ու այդպես էլ ՀՀ որևէ կառույց այս կամ սրա որևէ էլեմենտի վերաբերյալ պարզաբանումներ չի ներկայացրել։

Հայաստանում մեծ թվով պետական կառույցները, որպես կանոն, արագ արձագանքում են միայն իրենց ղեկավարներին ուղղված քննադատություններին և օպերատիվ գործում այն ժամանակ, երբ տարածվող տեղեկատվությունը վտանգ է ներկայացնում իշխանության ընդհանուր հետաքրքրություններին։

(Մեկնաբանություններում կրկին կզետեղեմ ՌԴ ՊՆ-ի պաշտոնական հաղորդագրությունը)։

Տիգրան Աբրահամյանի ֆեյսբուքյան էջից