«Պատրոն Դավոյից» հետո հաջորդ քավության նոխազն, ամենայն հավանականությամբ, կարող է լինել Դավիթ Տոնոյանը

Ամիսներ անց շփոթված իշխանությունը փորձում է իր մեղքը կոծկելու համար քավության նոխազներ փնտրել: «Պատրոն Դավիթի» հանդեպ քրեական գործը հենց այս շարքից է:

Վերջերս ՊՆ նախկին նախարար Դավիթ Տոնոյանի իր հարցազրույցում փորձում էր ակնարկել իշխանություններին, որ եթե իրեն նույնպես քավության նոխազ դարձնեն, ապա ինքը հանդես կգա բացահայտումներով: Տոնոյանը դա անում էր նուրբ և քողարկված ձևով: Նա փորձում էր ավելի շատ զգուշացնել, որպեսզի Փաշինյանը մեղադրական սլաքներն իր դեմ չուղղի:

Հայտնի է, որ իշխանության ներսում կան մարդիկ, ովքեր ուզում են այդ խնդիրը լուծել: Խոսքը ներկայիս նախարար Վաղարշակ Հարությունյանի  և Անդրանիկ Քոչարյանի մասին է, ովքեր փորձում են մի շարք մեղադրանքներ ներկայացնել Դավիթ Տոնոյանին, իսկ Նիկոլ Փաշինյանի մոտ փորձում են հաճոյանալ, որ հիմա քավության նոխազներ գտնելով կարելի է փոքր-ինչ թուլացնել հանրային դժգոհությունը Նիկոլ Փաշինյանի նկատմամբ:

Թե ինչպես կավարտվի այս գործընթացը, այսօր դժվար է ասել: Պարզ է մեկ բան, որ հիմնական գործընթացներն ընթանում են կուլիսների ետևում: Իսկ Դավիթ Տոնոյանի այն պնդումը, որ պատերազմից 4 օր անց Գլխավոր շտաբի նախազգուշացումից ինքը տեղյակ է եղել ու աջակցել է դրան, անուղղակի ակնարկ է այն բանի, որ, փաստացի, Նիկոլ Փաշինյանը հրաժարվել է զինված ուժերի միասնական տեսակետը հաշվի առնել, ինչի արդյունքում մենք ունեցանք նման խայտառակ պարտություն:

Թե ինչ լրացուցիչ բացահայտում մենք կունենանք Դավիթ Տոնոյանից, կախված է այն հանգամանքից, թե Փաշինյանն ինչքան կփորձի «խորանալ» ընդդեմ Դավիթ Տոնոյանի:

Սա՛ է իրականությունը:

Արտակ Հակոբյան