Վերջին շաբաթում կորոնավիրուսի հիվանդացությունն առավել բարձր է եղել Տավուշի, Սյունիքի, Լոռու մարզերում եւ Երևանում

Նոր կորոնավիրուսային վարակով հիվանդացության վերլուծության արդյունքում պարզվել է, որ վերջին շաբաթվա ընթացքում հիվանդացությունն առավել բարձր է եղել Տավուշի, Սյունիքի, Լոռու մարզերում եւ Երեւանում:

Առողջապահության նախարարության տարածած հաղորդագրության մեջ նաեւ նշվում է. «Կորոնավիրուսային հիվանդության (COVID-19) տարածման ռիսկը նվազեցնելու նպատակով առողջապահության նախարարությունը հորդորում է բնակչությանը բարձրացնել զգոնությունն անվտանգության կանոնների պահպանման նկատմամբ.

եթե տանն ունեք կորոնավիրուսային հիվանդությամբ կասկածելի կամ հաստատված դեպք, շփվելիս պահպանե՛ք առնվազն 1.5մ հեռավորություն,

կրե՛ք դիմակ, հնարավորինս խուսափե՛ք մարդաշատ վայրերից եւ մարդկային կուտակումներից,

տնտեսական գործունեություն իրականացնող կազմակերպություններ հաճախելիս խանութ, վարսավիրանոց, մեծածախ առեւտրի կենտրոններ եւ այլն) պարտադիր պահպանե՛ք սոցիալական հեռավորություն, կրե՛ք դիմակ, մակերեսների հետ շփումից հետո ախտահանե՛ք ձեռքերը 70%-անոց ալկոհոլային հիմքով ախտահանիչով կամ լվացվե՛ք օճառով,

սովորեցրե՛ք Ձեր երեխային հիգիենայի կանոնները եւ հետեւե՛ք վերջիններիս պահպանմանը,

սուր շնչառական հիվանդության ախտանշաններ (ջերմություն, հազ, հարբուխ) ի հայտ գալու դեպքում` անմիջապես կապվե՛ք Ձեր պոլիկլինիկայի բժշկի (թերապեւտի կամ մանկաբույժի) հետ:

Պահպանե՛ք անվտանգության կանոնները եւ եղե՛ք առողջ: