Այս տարի հունվարի 28-ին մասնակցում էի 19-ամյա եղբորս՝ մեր լուսավոր Դավիթի հուղարկավորությանը. Գոհար Մելոյան

Սահմանադրագետ Գոհար Մելոյանը ֆեյսբուքյան իր էջում գրում է.

«Կորսված հույսեր

Այսօր՝ հունվարի 28-ին, Հայաստանի Հանրապետությունում նշվում է Բանակի օրը։ Ինչպես շատերի, իմ և ընտանիքիս համար ևս այս տոնը մշտապես առանձնացել է իր խորհրդանշական բնույթով և միշտ եղել է սպասելի և սիրելի։ Այս տարի հունվարի 28-ին՝ այսօր, մասնակցում էի 19-ամյա եղբորս՝ մեր լուսավոր Դավիթի հուղարկավորությանը։ Դավիթը ծառայում էր ՀՀ զինված ուժերում և արցախյան երկրորդ պատերազմի մասնակից էր։

Հոկտեմբերի 5-ից Դավիթից լուր չկար։ Շուրջ երեք ամիս ամեն օր աչքերս փակել ու բացել ենք լավ լուրի հույսով: Սակայն երկու օր առաջ առերեսվեցի դաժան ու անողոք իրականությանը։ Կորսվեց այդքան փայփայված հույսս։ Աննկարագրելի դաժանության ու անարդարության ենք բախվել բոլորս, ովքեր ճանաչում էինք պայծառ Դավիթին և նրա ընտանիքին՝ նրա պես պայծառ ու բարի քույրերին՝ Մարինեիս, լուսահոգի Լիլիթիս, և իր բարի, ազնիվ ու համեստ ծնողներին՝ Կարենին ու Կարինեին։ Ինձ համար կորսված է նաև սիրելի տոնս, կոտրվել է հայերիս հաղթանակած ոգին։

Սա մեր պատմությունն է, մեր դժբախտությունն ու անամոք ցավը, մեկն այն հազարավոր պատմություններից, որոնք փաթաթեցին մեր բոլորի պարանոցին, որով մեզ դարձրին դժգույն ու դժբախտ։ Երանի հոգով աղքատներին….»: